Jamit udah ngabas penusah tanah tusur di Kampung China Bletih
KAPIT: Kaban Kunsil Nengeri ( ADUN) Bukit Goram Jefferson Jamit Unyat bedau lama ke udah bisi ngabas penusah tanah tusur ti nyadi di semanjai Lorong Satu, Kampung China Bletih, Jalai Bletih ditu.
Pejalai sida deka meresa ni naka tanah ti tusur nyema tau ngasuh parit enggau tanah tisi jalai runtuh.
Jamit disempulang bala ketuai komuniti diuluka Temenggong Tan Kian Hoo, Pemancha Yong Thu Fook, Penghulu Sia Shui poh, Kapitan Yap Hui Le enggau Kapitan Kong Cheak He.
Sama bisi nyempulang bala Staf Palan Servis Barisan Nasional (BN) – Bukit Goram – Edward Manggah, Cochnam Jawie enggau Alexson Nila.
Nitih ku Kapitan Yap Hui Le ti megai pengawa di Kampung China Bletih, madah, penusah tanah tusur nyadi pengudah ujan bangat sebedau nya.
“Penusah tanah tusur nyadi pengudah ujan bangat. Pen- eras ai ngujungka tanah rarat. Sebedau penusah tu, peranak betanamka buah brunei, limau, pisang, rian enggau bukai ke bukai. Aku nangika nyema tanah tusur terus nyadi nyangka tau ngeruga parit enggau mega ngerusak jalai,” ku Kapitan Yap Hui Le.
Meresa kandang ngelinggi, pengawa ti patut digaga nyema tanah tusur enda ditekat, tau endar ngeruga tiang tali karan muakka kanan jalai ti semak enggau penusah nya.
Pengudah pengawa ngabas tembu, Jamit minta Komiti Pemansang enggau Pengelikun Genturung Pendiau (JKKK) nganjung ripot ngagai Opis Kereja Raya (JKR) sereta Opis Parit enggau Entali Ai ngambi ngiga chara pemadu manah dikena nagang penusah tanah tusur terus nyadi.
Iya mega ngelalau JKKK ngena plastik ngebap kandang tanah ti tusur seraya nganti chara bukai nagang tanah tusur.
Kampung Bletih China ditu diuwan lebih 50 buah ruang bilik enggau ‘ Temporary Occupation Permit’ (TOL) diberi perintah beberapa taun ke udah. Penatai asal sida ari Kampung China Lorong Satu, Jalan Airport. Dalam taun 1999, penusah tanah tusur udah nabanka nyawa tiga iku diri sebilik – indai, anak lelaki enggau anak indu. Perintah mutuska sida dipindah ngagai menua ke diatu.