Nembiak menua pesisir patut ngulu program latih
Program latih lumba, main tu dikena sida ngerembaika pengelandik ba tikas nengeri tauka menua
SIBU: Nembiak sekula ari menua pesisir ba nengeri tu patut diberi awak ke manah ngulu program latih lumba enggau main baikka ba renggat nengeri tauka renggat menua dikena ngerembaika agi pengelandik sida ba main nya.
Sapit Direktor Bagi Lumba enggau Main Opis Menteri Pelajar Malaysia Zainal Abas madah, tu bepun ari nengeri Sarawak mayuh atlet ti ngembuan pengelebih sereta penyulut ke patut dikemansangka ari renggat sekula primari.
“Atlet ari nengeri Sarawak semampai mandangka penyulut ukai semina bepekit ba renggat menua tang nyengkaum bepekit ba renggat antarabansa baka Sukan SEA.
“Nya alai, kitai ngarapka nembiak sekula ba sekula primari menua pesisir ulih dibai ngambi bagi ba latih baka ba Sekula Lumba enggau Main Nengeri tauka Sekula Lumba enggau Main Menua,” pia ku iya madah.
Iya mantaika jaku tu maya dipebasa bejadi Kejohanan Sukan Sekolah Pribumi Sarawak 2017 ba Stadium Tun Ahmad Zaidi Adruce ditu, kemari.
Sama bela datai maya tu iya nya Sapit Direktor Opis Pelajar Nengeri Abang Mat Ali Masagus enggau Chairman Komiti Pengatur ti mega Ketuai Opis Pelajar Pelilih (PPD) Selangau Jambai Sayong.
Zainal mega madah, sukung ari Opis Pelajar, PPD enggau pengajar empu beguna dikena nentuka nengeri tu semampai ngembuan atlet ti mujur.
Bepun ari nya ku iya, pekit ke diatur baka sehari nya tau bendar nyidi pengelandik nembiak nyangka sida ngembuan pengelebih ngarika nengeri enggau menua tu dudi hari ila.
“Kelimpah ari nya, kebendar iya bala pengajar mega meseti landik meda pengelandik nembiak lalu meri awak ngagai sida nguji ukai semina seiti tauka dua iti aja bansa main aja.
“Enti kitai deka meda sida nyulut beri awak ngagai sida nguji macham bansa main tauka pekit tang ukai kelalu beguai meri pemutus ngasuh sida ngemeratka semina seiti main aja laban antara umur 12 taun pengelandik sida benung ngerembai,” ku iya madah baru.
Ku iya madah, pekit ba renggat sekula primari besai reti ngagai pemansang lumba enggau main nengeri tu kelimpah nempa ulah manah ba bala nembiak.
“Tu nyadika pun kitai meda nama pengelandik seiku-seiku nembiak sebedau pengelandik sida nya dikerembai enggau manah agi,” pia ku iya madah.
Dulu agi ari tu, Abang Mat Ali ba jaku pengelalu iya madahka pekit ke diatur nya seiti ari pengeransing nyukung jaku 1Murid 1Sukan menua tu.
Seraya nya ku iya, pemujur nembiak ukai semina ba pemujur pelajar aja tang mega bela bepun ari pemujur lumba enggau main.
“Pekara tu beguna dikena kitai nempa nembiak ngembuan peninggi penemu, identiti betikas tinggi lalu ngembuan pengelebih napi dunya mansang diatu,” ku iya sambil madah pekit nya mega meri awak ngagai nembiak menua pesisir muka runding sida ti nyadika pun pemujur pengidup dudi hari.
Atlet ari nengeri Sarawak semampai mandangka penyulut ukai semina bepekit ba renggat menua tang nyengkaum bepekit ba renggat antarabansa baka Sukan SEA. Zainal Abas Sapit Direktor Bagi Lumba enggau Main Opis Menteri Pelajar Malaysia