Penulis dipinta ngemeranka teknologi digital: Abg Johari
Nyerunyut ubah sereta nangkup pengerindu mensia mayuh ti deka macha chara ‘online’tauka ngena perengka ‘mobile’
KUCHING: Penulis nengeri tu dipinta ngemeranka teknologi digital dikena nangkup peminta enggau pengerindu mensia mayuh ti deka macha chara ‘online’ tauka ngena perengka ‘mobile’.
Kepala Menteri Datuk Patinggi (Dr) Abang Johari Tun Openg madah, laban diatu orang ulih macha surat kabar ngena e-version tauka versyen online.
Teknologi digital disema ngachau laban nyendiaka chara baru dikena kitai ngereja pengawa ke enda kala diperagam kitai sebedau tu, lalu orang suah irauka ubah ke nyadi, ku iya.
“Pemansang teknologi deka betapat enggau pemacha sereta industri nyelak, lebuh majak mayuh orang kelebih agi orang biak ti betukar tauka milih platform mobile.
“Teknologi digital udah meri peluang ngagai kitai ngereja mayuh pekara bekaul enggau bup dalam perengka mobile.
“Kitai enda patut berasai irau ngagai ubah ke nyadi tang kitai patut ngambi peluang ngena teknologi baru ngasilka produk baru,” ku iya.
Abang Johari mansutka pekara nya dalam teks jaku iya ti dibacha Sapit Kepala Menteri Datuk Amar Douglas Uggah Embas ti ngarika iya bejadika International Conference on Borneo Book Publishing & Borneo Book Fair 2017 ( BBPF 2017), kemari.
Aum besai enggau pengawa mandangka bup nya diatur Universiti Malaysia Sarawak (UNIMAS) nengah kerejasama Majlis Penerbitan Ilmiah Malaysia (MAPIM), Universiti Malaysia Sabah enggau Dewan Bahasa dan Pustaka Pampang Sarawak ba sebuah hotel ditu.
“Aku mai sereta meransang
Pemansang teknologi deka betapat enggau pemacha sereta industri nyelak, lebuh majak mayuh orang kelebih agi orang biak ti betukar tauka milih platform mobile. Datuk Patinggi (Dr) Abang Johari Tun Openg Kepala Menteri Sarawak
penyelak bup menua tu empu nambahka ukai semina bup fizikal tang mega bup elektronik ke ulih interaktif enggau pemacha,” ku Abang Johari.
Iya madahka nadai bida dalam industri bup ke alai mayuh aplikasyen ke ngeruga sereta dikena nganti bup biasa ke suah dikena tauka dipegai ba jari.
“Aku arap bendar UNIMAS ulih bejalaika tanggungpengawa sida nambahka aktiviti nulis enggau nyelak ti sebagi ari pemansang litericha di nengeri tu,” ku iya.
Berebak enggau tu Abang Johari minta sereta meransang raban penulis nengeri tu chakah agi nulis pasal Sarawak.
Pemacha kelebih agi baka librari patut meri sukung ngagai penulis kelebih agi nulis pekara bekaul enggau nengeri tu.
Borneo tu kaya enggau daya idup tauka main asal, jaku, sejarah, utai idup enggau utai tumbuh ke ulih meri penguntung enti pasal semua nya ulih ditulis sereta nengah chara nya ulih ngetan enggau kitai lebih meretika diri sama diri, ku iya.
“Aku meransang semua (penulis) ngambika nambah tauka ngemayuhka agi penyampu tajuk pasal Sarawak, lalu librari mega enda tau enda meli bup ari penulis menua tu empu.
“Baka ke dipadahka aku dulu tadi, sekeda daya idup tauka main asal, jaku enggau pengaya biodiversiti, lalu bisi mega biografi bala pemesai tauka ketuai ti mayuh mai penguntung ngagai pemansang nengeri,” ku iya.
Kelimpah ari nya dalam aum pengarang berita, Mandal Canselor UNIMAS Prof Datuk Dr Muhamad Kadim Suaidi madah, UNIMAS bisi juluk kediri empu ba pengawa ngasilka bup ninting taun.
Iya madahka piak universiti bisi nyendiaka insentif ngagai penulis ke asil sida iya mayuh dibeli pemacha tauka dijual.
“Juluk UNIMAS taun tu deka ngasilka ambis nadai 30 tajuk bup, ti lebih ngagai pekara bekaul enggau Borneo.
“Kami mega nempa kerejasama enggau penyelak antarabansa,” ku iya.
Sama bisi datai ba pengerami nya kemari Chairperson BBPF 2017, Associate Professor Dr. Jane Labadin enggau ke bukai.