KKLW ngemeratka pemansang fizikal dagang enggau pelajar

MIRI: Opis Menteri Pemansang Menua Pesisir Enggau Kandang Menua (KKLW) ukai semina ngemeratka pemansang fizikal aja tang mega meransang pengawa dagang enggau pelajar bepelasarka program.

Sapit Menteri KKLW Datuk Alexander Nanta Linggi madahka opis menteri iya mega udah ngenegapka pengawa dagang enggau pelajar nengah bajet ke sebedau tu.

“Karnival Usahawan Desa (KUD) ambika chunto, udah nempa mayuh pedagang ti tama ngagai makit luar enggau mayuh macham produk sida.

“KKLW endang meransang kaul komuniti dalam pengawa dagang dikena nyungkak penatai pemisi rayat kelebih ab di kandang menua pesisir,” ku iya lebuh ke nemuai seraya gawa ngagai Rumah Panjai Linggi Belaja di Lambir kemari.

Ku Alexander, KUD mega udah ngerembaika produk enggau servis bala pedagang besai agi sereta ngagai makit dunya.

“Perintah komited ba pengawa nambahka rega produk ngagai serata dunya lalu KUD nyadi pelasar ti beguna endar ngagai sida ti ngaul diri,” ku iya nerang.

Ku iya, KUD dua taun sekula nya deka diatur di Pusat Dagangan Dunia Putra (PWTC) berengkah ari 19 ngagai 22 Oktober.

Iya mega ngelalau peranak Sarawak anang muai peluang lalu nguji ngerembaika ekonomi ari pengawa nyerungkai dagang menua pesisir.

Ngenang pasal bidang pelajar, ku iya, KKLW udah nyediaka mayuh agih belanja dikena ngenegapka pelajar menua pesisir.

Tu nyengkaum muka kus baru enggau modul di Universiti Kuala Lumpur, Institut Kemahiran Mara (IKM) enggau Giatmara, palan nyeridi nembiak mit enggau ke bukai.

Iya nyamin juluk perintah deka nempa modal mensia ti nyulut deka nyapai juluk iya nengah program pelajar di baruh KKLW.

Ku iya nambah, opis menteri mega udah minta agih belanja besai beserimbai enggau Bajet 2018 ti deka dipejurai kena 27 Oktober tu.

Dalam bajet sebedau tu, penyampau agih belanja dikemendar ungkup KKLW manggai RM9.048 biliun, ke alai RM3.218 bilion ungkup Bajet Ngatur seraya RM5.83 biliun ungkup Bajet Pemansang.

“Baka opis menteri ke bukai, kami mega bisi minta agih belanja besai dalam Bajet 2018 lalu kami ngarapka mayuh agi projek deka dipejalai ungkup pengelantang rayat,” ku iya.

Iya mega ngarapka rayat deka meretika pejalai ngemendarka belanja ungkup projek perengka guna pemun lalu ukai semina mejah pengawa perintah kelebih agi pengari rayat.

“Kitai udah ngemendarka lebih 500 projek penyikap perengka guna pemun lalu ukai semua projek tu dikemendar tekala nya laban iya bepanggai ba peminta enggau pematut.

“Ba pekara tu, rayat patut anang nyalah perintah, kelebih agi pengari rayat nyema projek ti dipinta sida lubah dipejalai,” ku iya nambah.

Sama bisi datai Kaban Parlimen (MP) Sibuti Datuk Ahmad Lai Bujang, Kaban Kunsil Nengeri ( ADUN) Lambir Ripin Lamat, Tuai Rumah Linggie Belaja sereta bala temuai ke bukai.