JHS udah ngeluarka lebih sepuluh lisin ngasu baya
Pengudah gred baya dalam Ordinan Jelu Siga diturunka ari Appendiks I ngagai Appendiks II
KUCHING: Lebih ari sepuluh iti lisin ngasu baya udah dikeluarka Opis Kampung Sarawak (JHS), pengudah gred baya dalam Ordinan Jelu Siga, ari Appendiks I diturunka ngagai Appendiks II lalu ulih digaga nyadi komersil, pia ku Direktor JHS Sapuan Ahmad.
Ba Appendiks II tu, diatu baya ulih diasu lalu dijual ungkup pengawa komersil enda ngira di menua tu tauka di makit antarabansa.
“Reti nya, ngemendar ngasu baya lalu digaga nyadi komersil, ngagai pasar menua tu enggau antarabansa. Diatu, pengawa ngasu nya udah digaga, lisin pan lebih ari sepuluh udah dikeluarka tang semina sida ke ngasu tu, enda tau enda ngeripot ngagai JHS, madah ngagai kami berapa iku baya udah diasu,” ku Sapuan.
Iya madah munyi nya lebuh dikerandau pengudah nguluka Sapit Kepala Menteri ti mega nyadi Menteri Rampa Menua enggau Pengeraja Asal, Datuk Amar Awang Tengah Ali Hasan ngagai atur pengawa ‘Regional Forum Innovation, Inclusiveness and Impact: ‘Strengthening and Diversifying Financing for Protected Areas’ ti digulu lebih 500 iku pesereta ari menua tu enggau menua luar, di sebuah hotel ditu, ensana.
Iya nandu baru madahka, pemayuh lisin nya deka dikeluarka bepanggai ba berapa iku ke bisi ati deka ngasu baya nya, lalu naka ke diatu, lebih 10 iti lisin udah
Reti nya, ngemendar ngasu baya lalu digaga nyadi komersil, ngagai pasar menua tu enggau antarabansa. Diatu, pengawa ngasu nya udah digaga, lisin pan lebih ari sepuluh udah dikeluarka tang semina sida ke ngasu tu, enda tau enda ngeripot ngagai JHS, madah ngagai kami berapa iku baya udah diasu. Sapuan Ahmad Direktor JHS
dikeluarka.
Mayuh ari baya tu ku iya, mayuh ditemu di Batang Lupar enggau sitak Samarahan, tang enti di Kuching, endur ke mayuh baya, iya nya di Kuching Wetland (alai nanam kayu bakau) alai suba, pemayuh baya semina dalam kandang 300 iku baya aja, tang diatu udah nyapai lebih 800 iku.
“Sitak tu ngembuan pemayuh baya, lalu enti sema baya nya di asu, kami di JHS nadai ngeletakka ni naka pemayuh ke tau,” ku iya.
“Enggau pemendar ari aku sereta JHS, dalam ordinan menua madahka baya entara jelu ke dilindung, nya sigi amat, tang ungkup madahka kontroler ulih ngemendarka baya nya dibunuh enti betuju kena ngelindung diri empu.
“Reti nya, enti di serang, bakani ku kitai, ngenat aja tauka ngelaban? Nya alai, enti di serang, orang nya tau munuh baya nya,” ku iya.
Diatu ku iya, semina JHS begunaka sukung sereta pemendar ari komuniti entarabansa, ulih munuh baya nya (kena ngelindung diri empu ari kena serang) laban diatu di menua tu, kelalu mayuh baya, kelebih agi di Kuching Wetland.
Sebedau tu, di Kuching Wetland (2008), semina bisi urung 300 iku aja baya, tang diatu udah nambah ngagai urung 800.
“Perunding kita, seiku baya ulih betelu datai ngagai 80 igi. Nya alai, dalam tiap 2km jalai ai menua tu (ambika chunto di Kuching Wetland) bisi baya laban mensia mayuh diatu mayuh ngena jalai darat lalu jarang endar ngena jalai ai. Nya alai, manah endar gaya sungai enda inggar, muntang alai iya betelu.
“Nya alai, enti rumah panjai, kampung udah bisi ai paip di rumah, enda ibuh meh nurun ke ai mandi,” ku iya.
Naka kediatu, ku iya, ari asil ngasu baya nya, semina dikena di menua tu aja, alai mayuh isi baya nya diambi.
“Naka kediatu, kulit baya nya bedau dieksport, laban kitai enda tau enda ngiga makit kulit baya tu dulu. Perengka gun arias pan enti digaga ari kulit baya, enda begunaka kulit baya ke udah tuai, tang baya ke berumur dalam 3 taun.
“Taja pia, baka di rumah panjai, tauka kampung Bidayuh, pengawa munuh baya tu mali ba sekeda komunit orang asal menua tu. Ambika chunto, aku suah endar ninga orang di rumah panjai, enti sida iya munuh baya nya, tau diambi mimpi, laban baya nya tau ngeregau,” ku iya.
Lisin ngasu baya semina diberi ngagai orang ari menua tu aja, lalu nadai siti diberi ngagai orang ari menua luar.
“Kami enda meransang peminta ari menua luar ke minta lisin ngasu baya menua tu, tang semnia orang ari menua tu aja, ke landik agi laban sida iya nemu agi sitak sida iya empu,” ku iya.