Pemandai beguna ba pengidup kemaya hari tu
Komuniti dilalau ngemeratka pelajar sekula anak sida lalu diperansang meri sukung penuh ngagai sekula
KAPIT: Pemancha Enggin Nyipa minta komuniti ba kandang menua Sut, Sungai Antaroh enggau Sungai Bena meri sukung tegap ngagai sekula, Sekula Primari (SK) Nanga Antaroh.
Ku iya, diatu kitai diau dalam komuniti ti bepenemu lalu nya kebuah pelajar bala anak patut dikemerat.
“Enda ulih dikeenggai, bala ketuai (Temenggong, Pemancha, Penghulu tauka Tuai Rumah) kitai meseti bisi pengelandik idup enggau peneleba. Kitai idup dalam komuniti bepenemu ti dibai pemansang teknologi enggau sains.
“Aku nyadi pemancha tang aku seruran berunding sereta berandau begulai enggau bala bukai (ti bisi pelajar enggau penemu) pasal baka ni chara pemadu manah mai pemansang ngagai komuniti rumah panjai.
“Aku nadai kala berasai malu minta penemu ari bala bukai laban aku pechayaka penemu tu kereban ti bekuasa mai pemansang enggau pengelebih,” ku Enggin rambau gempuru diatur beserimbai enggau bejadika pengawa Makai Selamat enggau Nasih Tanah Projek Bekal Kuasa Karan Menua Pesisir (RES) diatur di Sut, Baleh, lemai Hari Dua, ti udah digulu beratus iku peranak menua nya.
“Rebak kitai (diatu umur manggai 60 taun enggau tuai agi), kitai kelia nadai peluang besekula. Kitai gawa ba tanah dikena ngidupka diri.
“Diatu, ngena penemu, rebak baru ngidupka diri nengah penemu enggau pengelandik (gawa perintah, kereja opis).
“Kitai meri terima kasih ngagai perintah ti udah nyediaka pelajar ngagai bala anak kitai. Sekula didiri semak enggau rumah panjai ngambika bala apai indai muntang nganjung anak sida besekula.
“Nya alai, aku ngelalau apai indai nganjung anak sida ngagai sekula. Komuniti menua tu meseti nyukung sekula dikena nentuka rebak baru kitai nerima pelajar ti menyana maya sida besekula,” ku Enggin ngelalau.
Ngenang pasal politik, ku Enggin, dalam pengidup iya, iya udah kala ngasaika dipegai enam iku pengari rayat pengudah merdeka.
“Enda lama agi kitai deka napi Pengawa Bepilih Besai Ke-14 (PRU14) dikena milih pengari rayat kitai ti deka ngarika kitai dalam parlimen. Ba kitai, endang nyata endar, kitai ngundi chalun perintah ti ulih gawaka pemansang ngagai kitai.
“Penyandang, Sapit Menteri Pemansang Menua Pesisir enggau Kandang Menua, Datuk Alexander Nanta Linggi, ke mega Kaban Parlimen (MP) Kapit, siku ketuai ti chukup kemerah.
“Iya udah bejalaika mayuh projek pemansang ba infra- struktur enggau penyikap perengka guna. Kitai semua bela nemu Kapit agi jauh tinggal di belakang dibanding enggau Kuching, Sibu tauka Bintulu, nya alai kitai patut ransing agi gawa, agi begunaka Nanta nyadi ketuai mantu kitai mansang.
“Aku ngapil ngagai bala pengundi di kandang menua Sut meri sukung tegap ngagai Nanta maya pengawa bepilih ti deka datai,” ku Enggin ngansak.
Pengawa sehari nya udah dipenyadika Kaban Kunsil Nengeri (ADUN) Pelagus, Wilson Nyabong Ijang.
Projek RES ti digaga di simpang Jalai Ulu Sungai Sut/Jalai Bena, Sungai Antaroh, Sut, Baleh ditu.
Sebedau tu, peranak dia bepanggai ba injin api ti meri kuasa karan. Tang enda lama agi sida deka nerima bekal kuasa karan 24 jam ari Grid Nengeri ti digaga ari baruh RES, ti nyadi sebagai ari pemansang dikena ngangkatka tikas pengidup peranak ke diau di menua pesisir.
Projek beungkus RM24 juta pulaika penguntung ngagai tiga buah rumah panjai, 26 pintu bilik Rumah Jugah Emperan, Rumah Belikau Ikau (17 pintu) enggau Rumah Sanggau Kerangan Pulau (28 pintu) di sepanjai Jalai Ulu Sungai Sut, Baleh ditu.
Projek tu berengkah digaga pengudah Gawai Dayak 2017 lalu dipelaba deka tembu dalam bulan Mac 2018 nengah tali karan ari simpang Jalai Bukit Goram/Jalai Antaroh ke alai 30 kilometer penyauh. Bisi 400 iti tiang deka didirika.
Kunteriktor besai, Revenue Scope Sdn Bhd enggau kunteriktor mit, Liko Installation Sdn Bhd, Kuching.
Pengudah tembu ila, RES deka nyendiaka bekal kuasa karan 24 jam ari Grid Nengeri ngagai tiga buah rumah ti udah disebut tadi. Taja pia, sebedau projek tu berengkah dipejalai, kitai ngatur pengawa makai selamat enggau minta berekat nentuka nya lanchar digaga. Kitai enggaika sebarang bukai nyadi.
Enda ulih dikeenggai, bala ketuai ( Temenggong, Pemancha, Penghulu tauka Tuai Rumah) kitai meseti bisi pengelandik idup enggau peneleba. Kitai idup dalam komuniti bepenemu ti dibai pemansang teknologi enggau sains. Enggin Nyipa Pemancha