Timpuh kemisi sekula 2018 deka ditukuka ngagai Opis Menteri Pelajar: Uggah
KUCHING: Pengamat timpuh kemisi sekula taun 2018 ke dikerembaika dalam media rama deka ditukuka dulu ngagai Opis Menteri Pelajar.
Sapit Kepala Menteri, Datuk Amar Douglas Uggah Embas madahka pekara nya enda disangka ngapa sereta patut ditukuka enggau opis menteri ti bekaul.
“Kitai deka ngenuku pengamat pasal nya ( timpuh kemisi sekula) enggau opis menteri dulu sebedau kitai meri timbal.
“Kebendar kitai udah bepadahka pekara tu enggau Dato Sri Michael Manyin (Menteri Pelajar, Sains enggau Pansik Teknologi) tang diatu iya di menua tasik, enti iya pulai iya deka mansik enggau opis menteri nya (pelajar).
“Aku enggai meri penerang dulu nyentuk bisi penerang sah pasal berita nya. Aku enggai nyangka sengapa ( speculate) laban nyangka sengapa nya (speculate) enda pintar,” ku iya.
Uggah mansutka penemu nya lebuh ditanya bekaul enggau timpuh kemisi penggal sekula 2018 ti dikeluarka Opis Menteri Pelajar sereta dikerembaika ba media rama, ti nimpuhka kemisi tengan taun berengkah pun bulan Jun.
Iya dikerandau pengarang berita pengudah bejadika International Conference Borneo Book Publishing & Borneo Book Fair 2017 (BBPF 2017) ke diatur Universiti Malaysia Sarawak (UNIMAS) enggau kerejasama Majlis Penerbitan Ilmiah Malaysia (MAPIM), Universiti Malaysia Sabah enggau Dewan Bahasa dan Pustaka Cawangan Sarawak ba sebuah hotel ditu, kemari.
Bepelasarka timpuh kemisi tengan sekula 2018 baka ti dikerembaika ba media rama iya nya berengkah 9 ngagai 24 Jun 2018.
Kelimpah ari nya lebuh ditanya bekaul enggau isu Pemakai Menua enggau Pulau Galau, Uggah madahka pekara nya udah diterangka Kepala Menteri Datuk Patinggi (Dr) Abang Johari Tun Openg beberapa hari ke udah.
Iya madahka naka ke diatu nadai pekara baru tang piak iya agi mengkang ngiga, ngulih enggau ngambi penemu ari mayuh piak.
Ku iya baka ba sebengkah program ke digulu iya di Sibu pagi kemari iyanhya seminar Budaya Iban, seiti ari agenda iya nya dikena ngiga penemu nama definisi ke engkeman ungkup Pemakai Menua enggau Pulau Galau.
“Aku ngasaika nuan (media) patut macha penerang ti dipansutka kepala menteri beberapa hari ke udah. Aku nadai utai deka ditambah. Diatu agi bekaul enggau definisi.
“Kami bisi nerima langgur penemu ari mayuh piak, mayuh orang udah ngatur aum sereta nganjung memorandum ngagai kami lalu kami mansik nya.
“Udah tentu seiti definisi, definisi mungkur Pemakai Menua enggau Pulau Galau,” ku iya nyaut lebuh ditanya sekalika definisi nya deka mungkur semua etnik tauka ungkup bansa Iban aja.