Kuching International Bike Week Ke-2 diatur kena 13-15 Oktober 2017
KUCHING: Sebengkah agi pengerami entarabansa, Kuching International Bike Week (KIBW) ke-2 ke deka digaga ari 13-15 Oktober 2017 tu, nyadi sebuah agi atur pengawa ke deka nyukung industri dagang temuai menua tu, lebuh urung 4,000 sida ke ngena mutosikal bekuasa besai deka datai di Bandaraya Kuching ujung minggu tu.
Menteri Dagang Temuai, Seni, Adat Pesaka, Nembiak, Lumba enggau Main ( KKKBS) Datuk Abdul Karim Rahman Hamzah madah gempuru tu ke deka digulu ulih raban bemutosikal entarabansa ari Sarawak, Semenanjung Malaysia, Singapore, Thailand, USA, UK, Brunei, Indonesia, Labuan, Australia, New Zeland nyengkaum kerabat diraja menua tu deka datai bebala mayuh enggau ngulu pengawa tu.
“Pengudah edisi pemungkal digaga taun 2015 mandangka pengawa tu mujur digaga ditu, tu kedua kali iya digaga ujung minggu tu ila. Enti iya mujur digaga baru, nyangka gempuru bemutosikal bekuasa besai tu deka dipasuk dalam kalendar dagang temuai menua tu,” ku Abdul Karim.
Iya madah munyi nya lebuh bechairmanka aum media bekait enggau Minggu Bemutosikal Bekuasa Besai Entarabansa Kuching 2017 ti deka digaga ari 13-15 Oktober minggu tu, di opis KPSKBS ditu, ensanus.
Iya madah pengatur gempuru tu, Iron Tiger Bikers Club Kuching ( ITBCK) ti disukung ulih Perintah Menua enggau KKKBS udah besetuju ngaga edisi ke-2 gempuru tu, ke jauh besai agi ari ti kala digaga dalam taun 2015.
Iya nandu baru madahka atur pengawa bansa tu deka ngeletakka Kuching nyadi sebuah palan pengerami bemutosikal bekuasa besai, siti ari program entarabansa ke mujur digaga di Bandaraya Kuching.
“Enti gempuru tu mujur nyapai tikas ke pengabis manah, program bansa tu deka dipajakka tiap dua taun nyadi palan ke raban bemutosiakl datai kitu.
“Lebuh sida iya datai kitu, raban bemutosikal bekuasa besai tu ukai semina begempuru di Kuching aja, tang mayuh agi program bukai deka digaga sida iya, laban pengawa bemutosikal bekuasa besai tu enda statik (jenuh) ditu aja, laban sida ke datai ari menua luar pan deka meda pemanah menua tu ngena mutosikal sida iya, lalu bejalai keluar ari Kuching,” ku iya.
Beserimbai enggau KIBW 2017, program ke udah dirintaika, iya nya KIBW Cowboy Ride (hari Lima, 13 Oktober ari pukul 2:30 ngalih hari ngagai 6 lemai), raban tu deka ngena mutosikal bekuasa besai ngagai Pasar Lama Siniawan,dalam urung pukul 2 ngalih hari, alai raban tu ila, deka dijamu ulih ADUN Serembu, Miro Simuh, lalu sekeda nya deka ngagai palan bebeli barang di CityOne, lalu kilah ke malam Malam Bekelala di palan pemerindang, Culture Club.
Hari kedua, iya nya 14 Oktober, raban bemutosikal bekuasa besai tu bisi ngaga program di palan bebeli barang di The Rooftop, City One, nyengkaum bejualka perengka guna mutosikal bekuasa besai.
Lalu kilah ke malam, raban bemutosikal bekuasa besai tu deka enggau ngulu Gala Night (di Hotel Pullman), alai temuai ti dibasa sama enggau makai lemai tu, iya nya Tuai Pemegai Menua, Tun Pehin Sri Abdul Taib Mahmud, Kepala Menteri Datuk Patinggi Abang Johari Tun Openg enggau sekeda pemesai bukai.
Ba atur pengawa makai lemai nya mega, entara pengawa pemerindang, iya nya bala model tauka peragawati bisi dibai mandangka (collections) sida iya.
Tang ke pengabis besai pengawa malam Gala nya, chabut betuah sapa ke deka bulih mutosikal jenama Harley Davidson Sportster entara lima buah mutosikal bekuasa besai deka di empu ulih pemenang malam nya.
Hari ke penudi, 15 Oktober deka ditangka enggau licha pasal pengelikun ngena mutosikal bekuasa besai sereta ‘Battle of the Band’ ke deka digaga ba The Rooftop, CityOne.
Seiku ari pengelandik ngaga ‘ stunt’ mutosikal bekuasa besai, sereta seiku orang ke tebilang dalam dunya mutosikal bekuasa besai, Aaron Twite deka mandangka pengelandik iya dalam kandang tiga hari nya, ngaga ‘stunt’ di The Rooftop, Cityone (13 Okt – 2: 30ngalih hari ngagai 6 lemai, 14 Okt – 12 tengahari, 4 lemai enggau 6 lemai, sereta 15 Okt – 12 tengahari, 3 lemai, enggau 6 lemai).
“Sida ke beminat enggau mutosikal bekuasa besai, mit tauka nadai ngembuan sebarang mutosikal, tu maya iya kita datai enggau ngulu, sereta diperindang enggau ‘stunt’ Aaron Twite.
“Pengawa bansa tu nyadi tulang belakang industri dagang temuai, laban dalam timpuh tu, hotel, kedai makai tauka restoran, palan dagang temuai bukai richah, sereta tau nambah pemisi sida iya tekala mayuh orang ari menua luar ngelawa Bandaraya Kuching,” ku iya.
Ba atur pengawa nya kemari, Perintah Menua nengah KKKBS bisi meri geran RM100,000.00 kena nyukung KIBW 2017, ke diberi ngagai ITBCK begulai enggau Borneo Tru Events ke udah bebendar endar ngaga program tu.