Projek ngisi tanah,ngaga dinding entara ba pendam St. Theresa udah tembu digaga

Utusan Borneo (Sarawak) - - Berita Iban -

KUCHING: Komiti Ngintu Pendam St. Theresa Parish Council, Serian udah nembuka projek ngisi tanah enggau ngaga dinding entara.

Dalam penerang berita sida ensanus, komiti nya madahka dua dinding entara 200 kaki enggau 120 kaki pemanjai sereta 8 kaki peninggi sereta pengawa ngisi tanah udah tembu digaga apin lama ke udah.

Ba aum komiti apin lama ke udah, sida mega merambu deka ngatur pengawa ngemanahka pendam nya udah tu.

Chairman Komiti, John Sup meri terima kasih ngagai Kaban Parlimen (MP) Serian Datuk Seri Richard Riot ti udah ngemendarka geran perintah sepenyampau RM30,000 dikena ngaga dinding entara sereta ngagai Kaban Kunsil Nengeri (ADUN) Bukit Semuja, John Ilus ti udah meri RM10,000 dikena ngisi tanah.

John mega bisi madahka komiti nya deka ngatur pengawa bejual bungai kena 29 Oktober di Gerija St. Theresa ditu maya ngintu All Souls Day.

Iya minta mensia mayuh bela datai meli bungai ari komiti nya dikena ngiga belanja ungkup wang turu ngintu pendam.

Tukang Pekara Wang Komiti, Simon Sung ngansak sida ti bisi kaban tauka bakih ditumbak ba pendam nya enggau sida ti dalam rintai nama ngambu tumu lot ngambi nyuaka pemeri sida ngagai wang turu ngintu ninting taun enggau jampat.

“Lis nama sida ti gerah jari deka diayanka ba papan notis di gerija ungkup penerang,” ku iya.

Ku iya, iya udah dilawa ba Chop King Thai, Pasar Serian bekaul pekara nya.

KOMITI: Komiti Ngintu Pendam St. Theresa’s Parish Council, Serian. (Baris mua ari kiba) Sekretari Tom Naar, Chairman John Sup, Mandal Chaiman Daniel Lom enggau Tukang Wang Simon Sung. Bala kaban Komiti (baris belakang ari kiba) Michael Tores, Joseph Chin enggau Joseph Then.

Newspapers in Malay

Newspapers from Malaysia

© PressReader. All rights reserved.