Disiplin chukup beguna dikena nentuka pemujur ba bidang lumba

Utusan Borneo (Sarawak) - - Berita Iban -

MARUDI: Bala atlit ti ngambi bagi dalam lumba meseti ngembuan disiplin sekalika di padang tauka ba sebarang main ti disereta sida.

Ngembuan disiplin deka nentuka kita deka nyapai pemujur ba sebarang bidang lumba sereta mayuh atlit tauka pemain ti bisi disiplih chukup nyulut dalam pengawa sida, baka ti udah didinga kitai.

Kelimpah ari ngaul diri dalam lumba, bala kita mega deka ngembuan runding ti manah sereta tubuh bepengerai.

Dikena nerenakka semangat siti tim antara bala atlit nya empu, penyapai individu enda sebaka enggau tim laban manah agi gawa nyadi siti tim.

Atlit enggau pemain ti bisi dispilin ti kala didinga kitai baka Pendelala Renong enggau Watson Nyambek, nya kebuah sida bulih gelar, pegari nama, ku iya. Nadai disiplin, deka ngemuntan pejalai kita taja kita bisi penau.

Penyulut dijapai dalam lumba patut nyadi pelasar dikena nyingkang ngagai tikas tinggi agi. Sedia besemekih enggau atlit ti nyulut agi.

Kelimpah ari nya ku iya, Perintah Sarawak deka ngemanahka pengawa ngena enggau standard Jaku English ba semua renggat di semua sekula di Sarawak.

Jaku Melayu beguna nyadi batang jaku enggau medium randau di sekula. Tang Perintah Nengeri kitai udah mutuska Jaku English nyadi Batang Jaku Kedua kitai berindik ari Jaku English nyadi jaku antarabansa, dikena ba mayuh bengkah menua di serata dunya.

Jaku English dikena ba pengawa dagang sereta English ulih nyadi dikena berandau.

Pekara tu udah dipansutka Sapit Speaker Aum Kunsil Nengeri ( DUN) Dato Gerawat Gala ke mega Kaban Kunsil Nengeri ( ADUN) Mulu, lebuh iya bejaku ba penmgawa bejadika Karnival Lumba Gabungan Tiga Sekula 2017 diatur di Sekula Primari (SK) Kuala Tutoh, urung sejam setengah ari ditu ngena bot ekspres, pagi kemari.

Lumba Tiga Sekawan keterubah datai ari SK Peking, SK Benawa enggau SK Kuala Tutoh ti nyadi pengatur.

Dato Gerawat lebuhka meri timbal ba sekeda peminta genturung pendiau enggau isu besai pasal jalai nyambung ari Kampung Benawa ngagai Kuala Tutoh, bisi 8 km penyauh, madah, nya kebuah iya ngemai Penulung Injinir Opis Kereja Raya (JKR) ari Miri ngambi beratika kar jalai enggau jalai ti benung dikemanah.

Ngelansa pasal bekal kuasa karan, ku iya, enti kitai nganti sambung tali karan ari Miri, nyangka agi lama laban kitai begunaka stesyen mit ti deka digaga di Logan Bunut, tang ba runding aku, sistem solar hibrid meri bekal ngagai Kuala Tutoh lalu kitai begunaka Sarawak Energy Berhad (SEB) beratika gaya pejalai iya.

“Kelimpah ari nya, berita manah ngagai sida ti kena tuntung penusah tanah tusur apin lama ke udah, laban aku udah bulih agih belanja enggau penyampau RM575,000.00 dikena ngaga tekat sepemanjai 100 meter.

“Sehari tu, Penulung Injinir Pelilih, Stephen Ung, bisi enggau kitai ditu deka meda ni patut digaga udah tu ila,” ku iya.

Berebak enggau nya, Dato Gerawat Gala udah ngemendarka geran Projek Mit Pemansang Menua Pesisir (MRP) penyampau RM2500 ungkup SK Sg Peking, RM2500 ngagai SK Benawa sereta RM3500 diberika SK Kuala Tutoh seraya RM3 da agi ungkup Rela Cop Kuala Tutoh, lalu chek MRP RM35,000 udah disua ngagai Komiti Pemansang enggau Pengelikun Genturung Pendiau (JKKK) Kuala Tutoh.

Bala ke bisi bejaku Kepala Pengajar SK Kuala Tutoh, Josilina@George Lina Goering enggau Chairman PIBG, Adolf Jau.

Sama bisi datai Sapit Pemesai Pelajar Baram Jalong @ Ugak Wan, Penghulu Herbert Lawai Epoi, Kuala Tutoh Headman, KK Bendidict Wak, Adolf Jau enggai siku orang dagang, Simon D.Gelan.

KENA MANAH : Dato Gerawat (tengah) nyuaka chek RM35,000 ngagai Penghulu Herbert Lawai seraya dikemata bala bukai.

NERANG: Zulkifli meri penerang ngagai raban pengarang berita pengudah tembu program penemuai seraya ke gawa nya.

Newspapers in Malay

Newspapers from Malaysia

© PressReader. All rights reserved.