Jamit muji Kelab Tropical Rainforest Hash Pampang Kapit

Utusan Borneo (Sarawak) - - Berita Iban -

KAPIT: Kaban Kunsil Nengeri (ADUN) Bukit Goram Jefferson Jamit Unyat meri puji ngagai Kelab Tropical Rainforest Hash Pampang Kapit ti chakah ngatur aktiviti ti disereta bala kaban kelab.

Iya mansutka jaku tu lebuh ngulu program ‘ Ngelepaska Tanglung’ diatur kelab nya di Pasar Kapit ti udah digulu 200 iku mensia mayuh ti datai ari semua serak pengidup, apin lama ke udah.

“Aku berasai gaga meda Kelab Hash Kapit chukup chakah ngatur aktiviti ungkup bala kaban iya. Aku bisi dipadah bala kita bisi ngatur ‘belanda hash’ ninting minggu di luar Kapit, bisi maya di Genturung Pendiau Selirik, Bukit Goram tauka di Bletih maya lemai ujung minggu.

“Kelimpah ari manahka pengerai nengah pengawa eksesais tubuh di luar, bala kita mega nerenakka pemanah tanggam kaul enggau pangan diri baka ti diperatika aku, bala kaban kita datai ari pupu bansa,” ku Jamit.

“Apin lama ke udah, bala kita udah ngintu genap taun kelapan kelab. Bala kita endang ba pela- sar ti engkeman endar bepun ari beberapa iku aja dataika diatu bisi lebih ari dua ratus iku kaban. Kelab tu terus relevan enggau ubah kemaya hari,” ku Jamit.

Iya udah nya ngemendarka belanja penyampau RM8,000 ungkup kelab bejalaika aktiviti sida. Iya mega bisi ngemendarka RM5,000 da agi ungkup Kelab Seni Ngetanka Diri China Kapit dikena ngatur aktiviti.

Berebak enggau nya, ketuai Kelab Has Kapit, Tan Peng Chuan ngarika kelab nya udah nyuaka pemeri RM2,000 ngagai Wang Turu Begunan Sekula SJK © Hock Lam. Duit tu asil ari pemeri bala kaban, lalu udah diterima Kepala Pengajar sekula, Wong Siew Ching.

Nyebut pasal politik, Jamiy minta bala kaban kelab nyukung perintah. Iya ngapil ngagai sida ngambika nyukung penyandang Sitak Parlimen Kapit, Datuk Alexander Nanta Linggi.

“Taun nyin tadi, 7 Mei 2016, kitai udah napi Pengawa Bepilih Nengeri (PRN). Pengawa Bepilih Besai Ke-14 (PRU14) ti deka datai dikena milih pengari rayat ti ngarika kitai dalam parlimen.

“Nanta tu chalun ti dipilih kitai. Aku ngapil ngagai semua kita ngambika meri sukung kitai ngagai Nanta nentuka iya ulih menang enggau majoriti besai. Kitai deka mai pesan ti terang ngagai Perintah Besai ke alai kitai nyukung Nanta laban kitai dekaka iya nampung pengawa nyadi ketuai ngambi ngenyampatka pemansang Kapit,” ku Jamit.

Sekretari Politik Kepala Menteri Sarawak Nicholas Kudi Jantai, Ketuai Kelab Hash Kapit, Tan Peng Chuan, Mandal Ketuai Kelab Hash Kapit Kimi Soon Peng Hai, Sekretari Kaunsilor David Wong Hau Ching, Temenggong Tan Kian Hoo, Pemancha Yong Thu Fook, Penghulu Sia Shui Poh, Penghulu Wong Kie Ing, Kapitan Yap Hui Le, Kapitan Kong Cheak He, Kapitan Yiap Yii Hoo, Sapit Pemesai Nembiak enggau Lumba Kapit Martin Sherman, sekeda ari 200 iku ke bisi datai.

Batang aktiviti iya nya ngelepaska tanglung di pasar enggau kandang ngelingi Pasar Kapit beserimbai enggau Festival Musim Luruh, apin lama ke udah.

Newspapers in Malay

Newspapers from Malaysia

© PressReader. All rights reserved.