Pemujur ukai semina dijapai nengah akademik, ku Roland

BINTULU: Jalai nyapai pemujur ukai semina nengah akademik tang ulih dijapai dalam bidang teknikal enggau pengelandik lebih agi dikena nangkup peminta ba minyak enggau gis ke majak ngerembai ba nengeri tu.

Menteri Muda Pemansang Tanah Adat, Datuk Roland Sagah Wee Inn madah, mayuh apai indai deka anak sida mujur ba akademik tang bisi agi jalai bukai ke ulih diperati tau meri pengidup ke lebih menyana dudi hari.

Ku iya, bisi palan khas ungkup chalun ke bepenau sereta landik ba bidang teknikal tu diguna dalam mayuh bengkah sektor industri.

“Guna pengelandik ba bidang teknikal patut diperatika semua piak laban perintah nengeri dipeda lebih ngemeratka sektor betupi ngagai pengawa industri,” ku iya.

Rolland ke mega Kaban Kunsil Nengeri ( ADUN) Tarat madah munyi nya rambau Pengerami Graduasi Nembiak Pom 6 enggau Program Pelajar Khas Integrasi ( PPKI) Sekula Sekondari ( SMK) Kidurong ngarika Menteri Bekal Ai enggau Elektrik Menua Pesisir Dato Sri Dr Stephen Rundi Utom ba Dewan Dagang China enggau Industri China Bintulu di Jalai Tanjung Batu kemari.

Bela bisi datai Pemesai Pelajar Pelilih Bintulu, Fred Entau enggau Tuai Dipebasa Gerempung Apai Indai enggau Pengajar (PIBG) SMK Kidurong, Rashid Seli.

Roland mega madah, Bintulu endang palan pemungkal pemansang industri ari sebengkah tumpuk pendiau orang berikan nyadi mengeri industri minyak enggau gis sereta alai bejalaika Koridor Kuasa Dikena Baru Sarawak (SCORE) ke minta semua piak lebih agi generasi baru sedia napi pinta pengereja pengawa ba sektor industri nya.

“Ukai semina guna dalam bidang kereja mit aja tang meseri masuk bidang industri ke ulih nyapai tikas 4.0,” ku iya.

Ku iya, pekara dikemerat mega ngangkatka peneras japai internet seraris enggau juluk nyingkang ngagai ekonomi digital dikena nyungkak agi ekonomi Sarawak.

Nya alai, ku iya, Ketua Menteri Datuk Patinggi Abang Johari Tun Abang Openg ngasuh rayat nyikap diri napi ekonomi digital laban perintah nengeri ngungkupka ungkus bekaul enggau perengka guna internet urung RM1 bilion di nengeri tu.

“Tu endang bidang digital ungkup pengidup dudi hari. Diatu Sarawak agi ba tikas 1.0 (manual) lalu bebendar nyapai tikas 2.0 iya nya modenasasi sereta udah nya deka nyingkang ngagai tikas 3.0 enggau 4.0 ke mungkur pengawa ngena injin moden lalu kurang nguna tulang mensia,” ku iya.

Atur tu ku iya, ukai semina engkeman nengah kontrol komputer dalam bejalaika mayuh pengawa ba bidang kereja, pengawa deka nyadi lebih muntang, ngelimat belanja sereta nempa industri mansang enggau manah.

Iya madah, pengerami graduasi sehari tu endang pemungkal ngagai bala nembiak masuk bidang pelajar sereta nempa pengelandik diri.

“Kitai ngembuan pengulih ke bebida ambika banding injinir elektrik bulih gaji ari injinir elektrik asil ari pengawa ukai injinir elektrik ti ngemanah sereta masang sambung karang ba rumah tang juruteknik ke nadai nyambung pelajar ba universiti,” ku iya.

Ku iya, tikas pengelandik juruteknik dalam bidang bekaul lebih manah ari orang ke bisi degree lalu patut diperati ba pengidup sida ninting hari ari mayuh sukut.

“Aku ukai deka ngelemika semangat enggau juluk kita nembiak tang kita patut nemu berunding utai ke nyadi diatu begunaka kita berati anang semina ngemeratka akademik aja.

“Ukai semua orang ke ngembuan penau ke sebaka dalam akademik laban bisi nya amat landik dalam sains teknikal, peneleba pengidup enggau mayub agi ke bukai,” ku terang iya.

Berebak enggau nya, prinsipal SMK Kidurong, Rosli Salleh madah pasal piak sida ngemeratka pengawa ngajar nembiak ukai sida ba sukut akademik aja tang mega bekaul enggau pengelandik ba luar kelas baka bidang ko- kurikulum enggau ke bukai.

Ku iya, SMK Kidurong udah nempa mayuh nembiak nyulut ba mayuh bidang nyengkaum lumba, inovasi enggau ke bukai nyentuk ngagai tikas pelajar ke tinggi nyengkaum ngemeratka jalai nembiak khas.