S’wak, Sabah deka nyadi Hub Memproses Biomas
Kededua nengeri tu ngembuan pengering teulihka pemujur ba industri biomas laban bisi mayuh biomas
KUCHING: Sarawak enggau Sabah deka nguluka menua tu ba industri biomas lalu nyadi Hub Memproses Biomas, ku Sapit Menteri Dagang Antarabansa enggau Industri Datuk Ahmad Maslan.
Bejaku ba Aum Antarabansa Biomas Malaysia 2017 (IBCM 2017) kemari, Ahmad pechaya kededua nengeri tu ngembuan pengering teulihka pemujur ba industri biomas ketegal ti bisi mayuh biomas.
“Menua tu ngembuan mayuh pengeraja asal, kandang endur ke strategik, pengereja pengawa ke landik enggau perengka guna ke chukup.
“Malaysia, kelebih agi Sarawak enggau Sabah ngembuan pengering ba genap sukut lalu ulih nyadi pemungkal ba industri biomas.
“Peluang tu ditukuka enggau terang ba Pelin Industri Biomas Sarawak enggau Sabah (SBIDP),’ku iya ba Palan Aum Borneo Kuching ( BCCK) ditu.
Ahmad nambah, industri biomas dalam timpuh berapa taun tu udah nyadi tiang penegap bio-ekonomi.
Ku iya, Malaysia diberi basa ba renggat antarabansa lalu nyadi menua ti dikerindu pemeranak puku ba pekara ke bekaul enggau industri biomas.
“Perintah keran ngemanah ekosistem ti tau nyaup ngerembaika industri tu di Malaysia.
“Kitai deka meda mayuh agi kompeni ngambi bagi ba industri biomas,”ku iya.
Ahmad nambah kompeni ke ngambi bagi ba projek teknologi gadung enggau nyandia servis ngemujur projek nyengkaum biomas diperunding diseliah ari chukai korporat.
Pekara nya ku iya nyengkaum chukai status ‘pioneer’ enggau elawin chukai beranakka puku.
Ngenang kaul ke sama, Ahmad madah Malaysian Investment Development Authority ( MIDA) dalam timpuh 2011 nyentuk ngagai 2016 udah ngemendar 226 projek biomas ti begunaka puku RM2.92 bilion.
Ari penyampau nya, RM733 juta diperanakka di Johor, RM571 juta di Selangor, RM472 juta (Sabah) ke alai Sarawak ke ba penuduk lumur semilan(RM93 juta).
IBCM 2017 diatur dua hari berunggu berengkah kemari lalu digulu urung 1,000 iku orang ti datai ari Australia, Singapura, Amerika Syarikat, Belanda, Korea Selatan, Denmark enggau Jepun.
Malaysia, kelebih agi Sarawak enggau Sabah ngembuan pengering ba genap sukut lalu ulih nyadi pemungkal ba industri biomas. Datuk Ahmad Maslan Sapit Menteri Dagang Antarabansa enggau Industri