NCR: Pansik mungkur semua pekara deka dipejalaika dulu
KUCHING: Sapit Kepala Menteri Datuk Amar Douglas Uggah Embas madah, empas ari kes tiga iku sida ke ngempu Tanah Hak Adat Bumiputera (NCR) ke lenyau tanah nyentuk ke selama iya di Kpg Lebor, Jalai Gedong, Serian deka dipansik Komiti Pemakai Menua (PM) enggau Pulau Galau (PG) ke mungkur semua pekara dulu.
Iya madah munyi nya lebuh dipinta nimbal pasal kes tu kena (Hari Lima, minggu nyin tadi) pengudah Kort Perintah Besai ngaga pemutus ke alai Kort Besai enda ulih merintah lalu ngemetulka tanah ke diempu,diseliah ari pajak gadai ke udah diberi.
Uggah ti mega nyadi Chairman Komiti Pemakai Menua (PM) enggau Pulau Galau ( PG) madah, komiti nya udah mansik sereta benung beratika kes tu lalu deka ngatur aum bekaul enggau pemerat tu.
“Kami udah bejurai pasal kes tu, lalu benung mansik kes tu, nangkanka nya ila deka ngatur aum pasal kes tu, engka dalam kandang minggu baru tu ila.
“Ba aum ke dulu agi, raban komiti tu deka mantai ngagai aku penerang pasal kes tu.
“Awakka pekara tu diputarka komiti kami silik agi, tang kami beratika pekara tu, lalu pekara tu patut diputarka ,” ku Uggah.
Iya madah munyi nya lebuh dikerandau pengudah bejadi Konferen Biomass Entarabansa 4.0: ‘InnovationLed-Bio Based Economy’, ke alai Uggah ngarika Kepala Menteri Datuk Patinggi Abang Johari Tun Openg, di Palan Konvensyen Borneo Kuching (BCCK) ditu, kemari.
Uggah ti mega Menteri Pengawa betanam betupi Moden, sereta Ekonomi, Tanah Adat NCR sereta Pemansang menua Pesisir lebuh ditanya baru enti pemetul bekaul enggau Kod Tanah deka dikejampatka, laban beratika pekara bekaul enggau PM enggau PG benung diputarka diatu, ku iya:
“Diatu bisi penanggul sereta pekara ke baru, ke patut diputarka, sigi sama deka di sengkaum ke sekali,” ku iya.
Bekaul enggau kes Tanah NCR di Kpg Lebor, Jalai Gedong, Serian, Kort Perintah Besai ngaga pemutus, iya nya Kort Besai enda ulih ngasuh perintah ngemetulka tanah ke diempu nya diseliah ari pajak gadai ke udah diberi.
Tiga iku orang ke ngempu tanah NCR ari genturung pendiau nya, ketegal pemutus Kort Besai nya, nadai agi tanah sida selama iya.
Responden kes nya, Tuai Rumah Nyutan Jami, Gangak Guma enggau Langa Kama, nadai pilih bukai tang semina nerima pampas tauka ganti rugi pengudah pemutus nya dikenataika Sapit Pengerijista Kort Besai, Edwin Paramjothy Michael Munniandy, kemari.
Panel Kort Besai nya diarika Ketuai Akim Menua Tun Raus Sharif sereta akim Kort Besai, Suriyadi Halim Omar, Zainun Ali, Balia Yusof Wahi enggau Jeffrey Tan.
Lebuh ngenataika pemutus kort nya, Muniandy madahka doktrin ‘ indefeasibility of title’ ke nyadi pemerat dalam Sitem Torrens, disengkaum dalam Seksyen 132 Kanun Tanah Sarawak.
Dalam kes tu ku iya, siti pekara beratti enda ulih dipejuraika, iya nya pajak sementara ti udah dikeluarka dalam taun 1996, lalu nangkan nya ku iya, plaintif (responden) ngeripot (fail) dalam bulan November 1998, madahka sida ngempu NCR nya ba atas sebagi ari tanah ke dibungkur pajak sementara lalu minta bagi sida diseliahka ari pajak sementara nya.
Ku iya baru, Seksyen 5(2)(a) enggau ( b) Kanun Tanah Sarawak ngungkupka, entara bukai, seagi-agi dokumen sida enda dikeluarka ba atas tanah NCR ti diulih seiku orang asal sitak nya, nya nyadi tanah perintah.
Nyimpul jaku iya, Muniandy madahka tu “Pemutus Kort Perintah Besai, iya nya Seksyen 132 Kanun Tanah Sarawak bekaul enggau ‘Indefeasibility of title’ agi dikena taja pan dipadahka NCR digaga ba atas tanah dalam chara baka ke ditetapka nengah Kanun ke sebaka’, ku iya.
Luyar ke ngarika responden/plaintif tu, iya nya See Chee How, ti mega ADUN Batu Lintang.