Pengerami Hari Orang Indu S’wak 2018 mekuh dalam bidang pengerai
KUCHING: Pengerami Hari Orang Indu Sarawak 2018 diperambu deka ngena rambai jaka ‘Orang Indu Sarawak Dalam Bidang Pengerai’.
Pekara nya dipadahka Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah, kemari.
Iya madahka nya dikena ngingat sereta meri basa ngagai orang indu dalam bidang pengerai ke mayuh udah meri sukung ngagai rayat sereta nengeri tu.
“Opis menteri kami begulai enggau Opis Orang Indu Ruang Bilik Sarawak sereta Majlis Wanita dan Keluarga Sarawak udah ngaga pemutus, taun baru maya Hari Orang Indu Sarawak 2018 kami udah netapka ngena rambai jaku ‘Orang Indu Sarawak Dalam Bidang Pengerai’.
“Maya hari orang indu renggat nengeri taun baru ( 2018), kami deka ngaga dokumentasi sereta nyelak bup lalu ngena rambia jaku ke sama. Dokumentasi nya deka mungkur orang indu dalam bidang pengerai berengkah ari jeman kemerdekaan nyentukka diatu.
“Tu sebengkah ari chara dikena kitai ngingat tauka meri basa ngagai raban orang indu dalam bidang tu,” ku iya seraya madahka bup ke dichelak nya nyadi ke lalau mensia mayuh jemah ila.
Fatimah mansutka pekara nya lebuh bejaku maya bejadika 3rd Sarawak Nursing Professional Annual Scientific Meeting : Let’s Promote Safe Health Care, ti diatur Sarawak Nursing Professional Association (SNPA) ba sebuah hotel ditu.
Ngenang pasal hari orang indu nya, Fatimah madahka juluk komiti hari orang indu iya nya urang 5,000 iku orang dikangau ngulu pengerami nya.
Nitihku iya, di Sarawak bisi 8,395 iku misi ti nyengkaum 170 iku lelaki lalu ke bukai nya orang indu ti mangku pengawa dalam beberapa kategori iya nya Jururawat Masyarakat, Jururawat Terlatih, Ketua Jururawat, Penyelia Jururawat enggau Pengajar Jururawat.
Berebak enggau tu lebuh ke ngenang rambai jaku aum besai nya ‘Let’s Promote Safe Health Care, iya madahka, nya senipak benar enggau tanggungpengawa ti ngemeratk pasal pengelikun pesakit ke deka berubat sekalika ba klinik tauka ba sepital, lalu nyeliahka risiko ngeruga nyawa.
“Aku ngarapka raban jururawat nengeri tu terus nambah sereta ngangkatka pengelandik enggau penemu diri. Ditu aku chukup gaga sereta temegah ati ngagai penylut ke ditempa semua jururawat,” ku iya ti nyadi patron.
Fatimah nyerumba pengerami nya, ngungkupka belan ja sepenyampau RM10,000 ngagai gerempung nya dikena ngatur program tauka aum besai ke sebaka taun 2018.
Sama bisi datai ba pengerami nya kemari, Chairperson Pengatur Lee Na, Presiden SNPA Christian Baun Lian, pengari Direktor Opis Pengerai Nengeri Sarawak Juliana Mohd Ali, Matron Pengerai Nengeri Aieshah Zainudin enggau ke bukai.