Pengelikun pesakit pekara ti dikemerat dalam profesyen pengerai
Pengelikun pesakit iya nya pekara ke endang dikemerat dalam bidang pengawa pengerai di nengeri tu nyengkaum pengawa bala misi.
Berindik ari pekara nya, Lee Na ke nyadi Chairman Pengatur 3rd Sarawak Nursing Professional Annual Scientific Meeting madahka aum ke sekali tu mekuh ngagai pengelikun pesakit iya nya ‘Let’s Promote Safe Health Care’.
Iya madahka nya senipak enggau 13 juluk pengelikun pesakit ke enda tau enda dititihka semua raban jururawat, lutur enggau ke bukai ti bekaul enggau profesyenal pengerai.
“Rambai jaku aum besai taun tu iya nya “let’s promote safe health care’ , ke alai kami ngemeran sereta ngemeratka aspek pengelikun pesakit.
“Tuju aum besai tu deka mansik baru chara ti pemadu baru kemaya hari tu sereta ngelala bagi faktor risiko bekaul enggau pengelikun pesakit enggau deka ngangkatka pengelikun pesakit.
“Aku arap bendar aum besai tu deka meri perspektif baru pasal pengelikun pesakit,” ku iya dalam jaku pengelalu aum besai nya, kemari.
Aum besai ke diatur ba sebuah hotel ditu udah mujur dipenyadika Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato sri Fatimah Abdullah.
Aum besai ke diatur berengakah 19 nyentuk 20 Oktober, digulu urung 220 iku pesereta ti nyengkaum ari Semenanjung Malaysia, Sabah enggau pesereta ari nengeri tu empu.
“Nengah aum besai tauka aktiviti tu, jururawat sereta profesyenal perubat ke bukai ulih nempa kaul sereta berandau enggau pangan diri bakani chara deka ngemanahka servis ngagai raban bansa,” ku iya.
Speaker ke dikangau bejaku sereta bekunsi penemu pasal pengelikun pesakit iya nya ari Opis Menteri Penge- rai Malaysia, Singapura, Penang sereta speaker ari nengeri tu empu.
Entara topik ke dikerandauka ba aum besai dua hari nya baka, To Make Error is Human: Quality and Safety Must Not Be Compromised; Promoting Safety Culture In Health Care System; Medication And Transfusion Without Harm enggau ke bukai.
Sama bisi datai ngagai pengerami nya kemari, Presiden Sarawak Nursing Proffesional Association Christina Baun Lian, State Health Matron Aieshah Zainudin sereta pengari direktor opis pengerai nengeri Sarawak, Juliana Mohd Ali enggau ke bukai.