Pemeli rumah patut diberi surat pala tanah enggau lengkas, ku Chong

KUCHING: Parti Tindakan Demokratik ( DAP) deka mantaika pekara bekaul enggau isu nadai diberi surat pala tanah ngagai pemeli rumah pengudah beberapa taun dibeli, ba Aum Kunsil Nengeri ( DUN) ke deka datai tu ila.

Chairman DAP Negeri, Chong Chieng Jen madahka, nya ngambika pemeli rumah kelebih agi projek rumah ungkus murah enggau rumah flat bulih surat pala tanah enggau pengelengkas ke ulih.

“Kami ( DAP) deka mantai penanggul bekaul enggau nadai ngeluarka surat pala tanah maya baum DUN, enggau juluk ngambika pengempu rumah nya bisi surat pala tanah sepengelengkas ke ulih,” ku iya ba aum pengarang berita ke diatur ba indu opis DAP ditu, kemari.

Aum pengarang berita nya mega bisi digulu beberapa pemeli rumah ke bedau ngembuan surat pala tanah sida iya.

Nitihku Chong ti mega Kaban Parlimen ( MP) Bandar Kuching, mayuh projek pengawa berumah enggau rumah flat dibaruh Perbadanan Pemabangunan Perumahan ( HDC) bedau diberi surat pala tanah pengudah beberapa taun nyual unit nya.

Iya madahka rumah flat ba Jalan Arang ke udah dijual pengelama 20 taun tang agi bisi ke bedau diberi surat pala tanah.

Kelimpah ari nya netara projek bukai ti disebut iya baka Taman Sri Jaya di Matang, Sri Mahmud, Malihah, RPR Siburan enggau Batu 13 Jalan Kuching- Serian.

Chong ti mega Kaban Kunsil Nengeri Kota Sentosa ngansak piak bekaul ngambika mutarka jampat penanggul ke ditapi pemeli rumah.