Ubah chara berunding dikena nentuka servis lebih kreatif
SARIKEI: Perintah chukup ngemeratka pemesai guna ulah kreatif enggau inovatif dalam servis perintah, ku Menteri Muda Kaunsil Kandang Menua, Datu Dr. Penguang Manggil.
Ku iya, servis perintah Sarawak, ulah kreatif enggau inovatif endang sebengkah ari batang pekara dalam Pelin Kereja Kuing Juluk Servis Perintah Nengeri 2010-2020.
“Pelin tu nyadika malin sereta langkar kuing juluk proses transformasyen sektor perintah nengeri Sarawak. Dikena nentuka ulah kreatif enggau inovasyen tu, orang ke gawa perintah patut ngubah chara berunding dikena nentuka produk baru tauka servis ke lebih kreatif.
“Orang ke gawa perintah patut ngembuan mayuh penemu sereta sereta ulah kreativiti enggau inovasyen ke tinggi. Laban ke nyadi orang gawa perintah ba jeman teknologi ke udah moden sereta mansang, tu mih peluang orang gawa perintah nguna teknologi ke diatu dikena nempa produk inovasyen tauka nyendia servis lebih kreatif.
“Ulah inovasyen enggau kreatif ngasilka pengawa tu manah, berinovasi, kreatif sereta jauh perati dalam ngemanahka sistem servis ngambika lebih bekualiti,” ku Penguang.
Iya madah munyi nya rambau Pengerami Ngintu Minggu Inovasi Servis Perintah Renggat Nengeri Sarawak (Zon Tengah) 2017 enggau Eksibisyen Innowaste nengah teks iya ke dibacha Sekretari Mendam Opis Menteri Kaunsil Kandang Menua enggau Pengawa Berumah, Bakrie Zaini ke diatur ba Dewan Suarah Sarikei, ensanus.
Nitihku Penguang, barang ke udah dibuai ngembuan mayuh pemaik nyema iya dikena baru enggau chara ke lebih kretif.
Ku iya, buah penemu kreatiif dalam nguna baru barang ke udah dibuai endang siti ulah ti pintar laban nyaup mutarka pengamah rampa menua.
“Baka ke bela ditemu kitai, penyampau uras ninting taun majak mayuh. Penyampau nya tentu deka ngujungka palan tugung uras diatu jampat penuh.
“Nya alai perintah sigi meransang pengawa misahka uruas bepun ari rumah. Nyema komuniti diajar enggau penemu 3R, sereta nemu pengawa ke patut digaga lalu nempa utai ari barang ke udah dibuai tu, aku andal statistik uras ke dibuai ulih dikurang.
Tambah mega, saup ari mensia mayuh bekaul enggau pengawa Nguna Baru Barang chukup beguna ngambika ulih mantu Piak Kaunsil Kandang Menua (PBT) mutarka penanggl uras ngachir, parit alit, penanggul nyamuk betelu enggau mayuh agi ke bukai.