Palan servis MDS ditumbuh ba Eastern Mall, Siburan
SIBURAN: Palan Servis Majlis Daerah Serian (MDS) di Eastern Mall, Siburan dipenyadi Menteri Muda Perengka Pengangkut Datuk Dr Jerip Susil kemari.
Palan nya ditumbuh ngambi ulih meri awak ngagai peranak ke diau ngelingi teulihka servis ke disedia MDS lalu sida enda ibuh nurun ke Serian.
“Nengah palan servis ke ditumbuhka di Siburan, peranak ke diau ngelingi lantang ngulihka servis.
“Kelimpah ari nya, palan tu mega deka nelebaka rayat ditu laban Siburan diatu udah dipegai MDS lalu ukai dipegai Opis Kunsil Kandang Padawan (MPP) agi,’ku iya.
Iya ke mega ADUN Mambong nambah, servis ke disediaka di Siburan nya deka seruran diangkatmanah sereta ngarap jemah ila palan servis nya deka bisi begunan kediri empu.
“Servis tu sigi ungkup peranak ke diau ngelingi Siburan ti udah majak nambah,’ku iya.
Ba pengawa ke sama, Program Interaksyen begulai enggau komuniti bisi mega diatur lalu digulu sekeda raban ketuai bansa Pelilih Serian.
Program nya ku Dr Jerip diatur enggau tuju ngerapitka kaul peranak Siburan enggau raban ketuai bansa sereta MDS ti baru udah ditumbuh.
Kemari mega Dr Jerip bisi bejadi kimpin ‘Say No to Styrofoam, Polystrene and Plastic Bag’ ti diteritka MDS.
Kimpin nyadi sebengkah inisiatif Opis Menteri Kunsil Kandang Nengeri dikena nerenak pemereti sentang guna ngintu pemaik rampak menua ngagai rayat.
Bela datai Pemesai Pelilih Serian ke mega Chairman MDS Lim Hock Meng.