Perintah BN keran deka ngemansang Nengeri S’wak
Enda ngira dini endur perintah tetap deka mai pemansang ngagai kandang menua nya, ku Uggah
KUCHING: Perintah Barisan Nasional (BN) seruran bebendar mai pemansang ngagai tetiap kandang menua di Nengeri Sarawak, pia ku Sapit Kepala Menteri, Datuk Amar Douglas Uggah Embas.
Iya madah, enda ngira dini penyauh rayat diau, ambika banding di menua pesisir di genturung pendiau, perintah tetap deka mai pemansang ngagai kandang menua nya.
“Kitai udah ngereja sereta deka terus ngereja ti pemadu manah dikena mantu rayat dikena mai transformasyen pemansang di kandang menua sida,” ku iya.
Iya mansutka pekara nya lebuh bejadika ‘Majlis Pelepasan Program Kembara’ Batang Lupar Opis Menteri pemansang Orang Indu, Ruang Bilik enggau Raban Bansa (KPWKM) ba sebuah hotel ditu, kemari. Bisi datai, Menteri KWPKM Dato Sri Rohani Abdul Karim.
Bisi 40 iku pengemeran media ari Kuala Lumpur enggau Kuching nyereta program kembara nya ti mungkur kandang sidak Parlimen Batang Lupar kemari nyentuk 22 Oktober tu.
Ngenang pasal program nya, Uggah ti mega Menteri Betanam Betupi Moden, Tanah Adat enggau Pemansang Kandang Menua madahka program nya sebengkah chara dikena perintah ngempitka diri enggau rayat.
“Program kembara ti sebengkah inisiatif ke chukup manah laban meri peluang ngagai pengemeran media meda ke diri empu pemansang ke dibai sereta dipejalaika perintah.
“Tu lalu ngayanka peranak menua pesisir seruran dikemeratka perintah. Engka jemah ila, aku ulih bejalaika program ke sama ba sitak aku,” ku iya.
Dulu ari nya, Rohani madahka kelimpah ari nyuadi pelasar pemadu beguna sereta besai reti ngagai KPWKM mantaika asil pengawa ke dipejalaika opis menteri, program nya mega meri peluang ngagai perintah ngelakuka palan dagang temuai ke jarang dilawa ba kandang menua Batang Lupar.
“Nambahka nya, tu mega nyadi pelasar endur meri penerang pasal isu bekaul enggau opis menteri ngagai media dikena ngenukuka pengeremai penerang betul sereta ngenegapka kaul komunikasyen strategik,” ku iya.
Kitai udah ngereja sereta deka terus ngereja ti pemadu manah dikena mantu rayat dikena mai transformasyen pemansang di kandang menua sida. Datuk Amar Douglas Uggah Embas Sapit Kepala Menteri Sarawak