Apai Indai, KEMAS patut rat kaul ngemansang pelajar pra sekula

KAPIT: Kaban Kunsil Nengeri ( ADUN) Bukit Goram Jefferson Jamit Unyat deka semua apai indai nempa kerejasama kerjasama tegap enggau Opis Pemansang Raban Bansa (KEMAS) dalam nentuka pemansang pelajar anak diri empu.

Ku iya, KEMAS endang ejensi ba baruh Opis Menteri Pemansang Menua Pesisir enggau Kandang Menua (KKLW) ngembuan tanggungpengawa baka pemansang komuniti, kelas ekonomi, kelas ngajar orang besai tuai, ngelatih pengelandik enggau pelajar pra sekula.

“KEMAS nyendiaka pelajar pra sekula pemadu manah ungkup anak mit ke beumur lima ngagai enam taun. Kelimpah nya, dikena nyikap sida sebedau masuk besekula ba Primari 1.

“Sida diajar pengelandik pemun baka berunding, mai diri, nulis, ngira enggau nempa pengerindu sida belajar,” ku iya rambau bejadika Pengerami Konvokesyen Nembiak Tadika KEMAS Parlimen Kapit ba Dewan Kejora, SMK Kapit 2, Jalai Bletih ditu, apin lama ke udah.

Jamit madah, apai indai patut bejalaika tanggungpengawa meri motivasi dikena nempa pengerindu anak besekula sereta belajar bebendar.

“Beri perati ngagai pelajar tumu anak kita maya sida ba pra sekula nyentuk belajar ngagai tikas ke tinggi baka di universiti. Pengawa tu besai guna laban pemar dunya kemaya hari bepanggai ngagai komuniti ke pintar penemu,” ku iya.

Kenu ku iya, peranak sitak Parlimen Kapit mungkur DUN Katibas, Bukit Goram enggau Pelagus ngembuan penyelai laban mayuh Tadika KEMAS udah ditumbuh ba rumah panjai nyendika pelajar pra sekula.

“Apai indai enda ibuh nganjung anak sida jauh ke mengeri ngelawa kelas pra sekula. Tu endang sebagi ari inisiatif perintah dalam nyendiaka pelajar pra sekula ungkup rayat di menua pesisir,” ku iya.

Ba pengerami nya, urung 227 nembiak ari 28 Tadika KEMAS nerima setpikit pra sekula diri empu.

Jamit mega bisi ngungkupka geran sebanyak RM5,000 ngagai KEMAS Bagi Menua Kapit lalu iya ngarika Sapit Menteri Pemansang Menua Pesisir enggau Kandang Menua Datuk Alexander Nanta Linggi bisi ngungkupka geran RM5,000.