Peranak Rumah Panjai Long Leng udah dibekal lekterik 24 jam
KUCHING: Juluk peranak Rumah Panjai Long Leng, Layun, Telang Usan ngasaika bekal lektrik nyadi nyata pengudah perintah nyendia bekal nya nengah sistem solar.
Menteri Muda Lektrik Menua Pesisir, Dr Abdul Rahman Junaidi madah bekal lektrik chara solar nya disedia nengah Program Bekal Lektrik Menua Pesisir.
“Program tu mantu rayat ke alai bekal lektrik nengah chara solar tu ulih dikena 24 jam lalu enda inggar baka generator,” ku iya.
Iya mansutka jaku nya rambau ngulu program nemuai seraya kereja ngagai Rumah Panjai Long Leng, Layun di Telang Usan, bedau lama tu tadi.
Penemuai Dr Abdul Rahman ke mega Kaban Kunsil Nengeri ( ADUN) Pantai Damai disempulang Kaban Parlimen (MP) Baram Anyi Ngau.
Ku Dr Abdul Rahman nambah, 41 bilik rumah panjai Long Leng, Layun ke diwan 164 iku orang deka teulihka pengelantang bekal lekterik nya.
Iya ngarap bekal lekterik ke disedia perintah nya ulih dikena enggau manah.
“Kena enggau manah ngam- bi tau mulaika penguntung ekonomi ketegal genturung pendiau tu tau dikemansang nyadi palan dagang,” ku iya.
Ngenang kaul bukai, iya madah perintah mega keran ngemansang sistem digital di selampur Sarawak.
Pekara nya ku iya mungkur kandang endur ngelingi Long Leng ngambika peranak ke diau ngelingi ulih ngadu interaksyen enggau dunya luar.