Tiga pampang PBB dekaka Wan Junaidi dichalun baru
KUCHING: Raban ketuai orang indu Parti Pesaka Bumiputera Bersatu (PBB) ari tiga pampang kandang Parlimen P.193 Santubong dekaka Dato Sri Wan Junaidi Tuanku Jaafar sekali agi nyadi chalun ba pengawa Bepilih Besai Ke-14 (PRU14) ti deka datai.
Sukung nya datai ari ketuai orang indu PBB pampang N. 3 Tanjong Datu, N. 4 Pantai Damai enggau N.5 Demak Laut ti ngarika kaban parti sereta rayat.
Nitihka penerang Ketuai Orang Indu PBB N.3 Tanjong Datu, Cr Fatimah Abdullah, seiti aum udah diadu bedau lama tu tadi ke alai sida semua nyukung Wan Junaidi nyadi chalun ungkup penuduk parlimen Santubong.
“Mayuh pemeri baka ke geran udah diagih Wan Junaidi, ukai semina di Tanjung Datu aja tang mega di Pantai Damai enggau Demak laut.
“Ketegal nya, kami ngarap raban ketuai renggat tinggi Barisan Nasional (BN) ngenanka Wan Junaidi nyadi chalun kami di Santubong ba PRU14 ti deka diadu sebarang maya,” ku iya ba pengerami makai lemai di seiti hotel ditu, malam ensanus.
Ketuai Orang Indu PBB N.4 Pantai Damai, Jamaiyah Sulaiman ke mega chairman pengatur makai lemai bela dekaka Wan Junaidi sekali agi nyadi chalun.
Ku iya, peranak Santubong mengkang begunaka embing Wan Junaidi lalu ngarap pemangku ke mega Menteri Pengeraja Asal enggau Rampa Menua nya terus meri servis di Santubong.
Ngenang kalu ke sama, Sekretari Politik ngagai Menteri Pengeraja Asal enggau Rampa Menua, Dato Sri Wan Hamzah Wan Paie ti datai ngarika menteri sereta pemangku penuduk nya madah ukai semina raban orang indu tang rayat ari renggat ke baruh mengkang dekaka Wan Junaidi.
“Aku udah gawa begulai enggau iya kenyau ti nyadi kaban parlimen nyentukka dichiri nyadi Menteri Pengeraja Asal eggau Rampa Menua.
“Sekumbang timpuh nya aku udah meda pengangkun iya gawa lalu enda disangkal komitmen iya lebih agi ari orang ke biak.
“Aku pechaya ba PRU14 tu, iya ulih ngenanka penuduk Santubong nengah majoriti ke lebih besai,” ku Wan Hamzah.