Maya haribulan PRU14 diatur agi nyadi tanda tanya
KUCHING: Nadai kelai haribulan Pengawa bepilih Besai Ke-14 (PRU14) dikerandauka maya Gempuru Raban Pengawa Bepilih Barisan Nasional (BN) PRU14 ke diatur di Kuala Lumpur, kemari.
Pekara nya dipadahka beberapa ketuai parti komponen BN nengeri ke sama bisi ngulu program ti dipenyadika Menteri Besai ti mega Chairman BN Pusat, Datuk Seri Najib Tun Razak ba Pusat Dagangan Dunia Putra (PWTC).
Presiden Parti Rakyat Sarawak ( PRS) Tan Sri Datuk Amar James Jemut Masing madahka, sida semina diberi licha bekaul enggau bakani BN patut besedia sereta betapi enggau pengawa bepilih ke deka datai.
“Kami semina diberi licha pekara nya sebedau pengawa bepilih diatur sereta nadai kelai (haribulan PRU) dikenang.
“Taja pia ba kitai di Sarawak, kitai seruran nyikap diri laban kitai betapi enggau dua kali pengawa bepilih iya nya PRU eng- gau PRN, ke baru udah diatur kitai.” ku iya lebuh ditelefon Utusan Borneo ditu, kemari.
Sapit Kepala Menteri nya madahka, Sarawak seruran sedia sereta nyikap diri betapi enggau pengawa bepilih dibandingka enggau Semenajung Malaysia ti patut lebih sedia.
“Di Sarawak pengudah PRN diatur, kitai deka ngatur PRU lalu pengangat nyendiaka diri nya agi bisi,” ku iya.
Kelimpah ari Masing, Sekretari Besai Parti Demokratik Progresif (PDP) Datuk Anthony Nogeh Gumbek madahka pekara ti sama iya nya sida semina diberi licha pasal atur penyendia napi PRU14.
“Nya semina licha bekaul enggau nyikap diri napi PRU14 lalu nadai hari bulan diberi ( hari bulan PRU),” ku iya nyaut enggau pandak.
Presiden Parti Rakyat Bersatu Sarawak ( SUPP) Datuk Sr Sim Kui Hian madahka,” Semina pasal penyikapraban pengawa bepilih parti ungkup PRU 14.”
Kelimpah ari nya bekaul enggau isu bukai, Masing madahka diri enda lantang ati bekaul enggau kain rentang panggau ti semina ngayanka ketuai pemadu tinggi UMNO aja.
Iya madahka nya baka ti ngayanka nya semina lebih ngagai UMNO (UMNO centric) sereta nadai presiden parti komponen BN bukai.
Bejaku baru, licha ti diberi mega semian pegawai UMNO pasal raban pengawa bepilih ungkup PRU14 sereta semua program baka lebih ngagai UMNO.
“Tu ngasuh kami enda lantang aati. UMNO patut inklusif sereta berundingka BN bisi komponen bukai ke patut dipeda.
“Ba aku, aku empu enda lantang ati enggau gambar ba kain rentang panggau ke dikena nya baka mandangka nya semina bekaul enggau UMNO (UMNO centric),” ku iya.
Dipadahka ba program nya Menteri Besai ti mega Chairman BN pusat bisi bejaku nyerumba bejadika gempuru nya.