USKCS agi ngandalka Entulu dipilih ngetanka penuduk Selangau
SIBU: Pemujur Datuk Joseph Entulu Belaun bejalaika tanggungpengawa nyadi pengari rayat ba Parlimen Selangau ngelama tu nyadika batang kebuah Urus Setia Saudara Kita Cawangan Sekuau (USKCS) ngandalka iya mengkang bediri ba penuduk nya maya Pengawa Bepilih Besai Ke-14 (PRU14) ti deka datai.
Chairman USKCS Mohd Ali Abdullah madah, pengandal gerempung sida bela sebaka penemu enggau rayat bukai ba Parlimen nya bepun ari sejarah maya PRU13 suba mandangka Entulu menang enggau majoriti ke besai, kelai rayat dia beamat begunaka iya.
“Kami Muslim- Iban di Sekuau enda ngira raban nembiak tauka sida ke tuai agi ngarapka Entulu nyadi Kaban Parlimen Selangau.
“Sukung kami tu bepun ari kami udah nyengala meda pemujur iya megai rayat ditu ngelama tu,” pia ku iya madah.
Ku Mohd Ali, pemujur Entulu maya PRU14 tu ila besai amat reti ngagai pemujur iya nandu ngaduka pemansang ba parlimen nya.
Iya madah, nengah pangku pengawa nyadi Menteri ba Opis Menteri Besai, Entulu ngembuan kaul ke manah enggau menteri ba Perintah Besai lalu tu deka ngemujurka agi pengawa numbuhka pemansang baikka ba sosio ekonomi tauka pemansang ke bukai.
“Kami ditu udah nemu Entulu seiku pengari rayat ti muntang dibai berandau kelimpah dikelala nyadi seiku pemesai ti ngembuan timpai penemu ke jauh ngaduka pemansang.
“Iya enda bechiping mutarka penanggul rayat enda ngira bansa tauka jalai pengarap,” ku iya madah baru.
Agi ngenang pemanah Entulu, Mohd Ali mega madah, ninting maya Hari Raya Korban, iya enda kala enda nyuaka pemeri ngagai sida ngemujurka pengawa nya.
Empai lama tu tadi, Parti Rayat Sarawak (PRS) Tamin ari Komiti Besai Indu enggau Raban Nembiak bela mantaika penemu ti sebaka deka meda Entulu mengkang nyadi chulun Barisan Nasional (BN)-PRS ba penuduk nya maya PRU14.
Ba sida, sida kering madahka diri enda kakang ngenggai tauka mantah sapasapa chalun baru ke dipilih nganti Entulu.
Naka ke diatu, PRS empai terang madahka Entulu mengkang ngarika sida ngetanka penuduk nya ba PRU14.
Tu ngepunka macham bengkah penemu tebantai nyengkaum bisi madahka Entulu deka disilih enggau chalun baru parti nya.