Batang Oya patut digazet nyadi sungai ke ulih alai ngasu baya

MUKAH: Batang Oya patut digazet nyadi siti ari sungai ti ngemendarka pengawa ngasu baya.

Siku ari peranak ti ngarika sida semenua, Kaunsilor Arini Suhaili madah, baya suah dipeda ayan di sepemanjai sungai nya lalu tu ngasuh peranak ke diau dia irau.

“Kami endang suah meda baya besai ba sepanjai Batang Oya, tambah mega kitai udah suah napi penusah diserang jagu dalam kandang beberapa taun tu,” ku iya madah ngagai Utusan Borneo kemari.

Iya ditanya bekaul pengawa raban Sarawak Forestry Corporation (SFC) benung chakah ngasu jelu nya di sekeda endur di Sarawak kandang beberapa hari tu.

Nitih ku iya, taja bisi SFC datai pengudah penusah serang jagu kepenudi diripot di kandang menua nya lalu bisi udah ditangkap, tang baka ti udah dipadah, reptilia ti balat ngirauka ati agi suah dipeda ayan.

Pekara ti balat dikenangi peranak dia iya nya pemesai jagu ke bisi di Batang Oya diatu lalu dipelaba deka siga nyema bisi bepansa enggau mensia.

Kebuah pia, sungai endang udah nyadi batang pengidup peranak dia, tebal agi ngereja pengawa berikan.

Ba lansa ke bukai, siku peranak di Matu, Ayub Alli, enda setujuka pengawa ngasu baya di Sungai Matu kandang diatu.

“Tejuka aja, nyema kitai enda ngachau sida ( jagu), sida (jagu) enda deka ngachau kitai,” ku iya nimbal.

Ku penemu iya, taja suah meda baya enggau kes orang tetemuka baya ba Sungai Matu, tu kes ti mit lalu bedau bisi pematut ngasu reptilia tu.

Ayub mega madah, nyauka 50 taun iya diau mendam di genturung pendiau Matu, bedau isi ripot mensia diserang jagu lalu iya berasai lantang enggau pekara nya.