Dr Rayong nyukung penemu chairman BN ti ngemeratka chalun ulih menang PRU14
KUCHING: Atur lama dia sebengkah parti politik ngempu sebengkah penuduk udah enda ulih dikena agi, ku Ketuai Bagi Nembiak Parti Rakyat Bersatu (UPP) Dr Johnichal Rayong Nyipa.
Rayong ke mega Kaban Kunsil Nengeri ( ADUN) Engkilili setuju enggau penemu Chairman Barisan Nasional (BN) Datuk Seri Najib Tun Razak dia nadai siti parti ulih ngaku ngempu sebengkah penuduk selama iya.
“Pekara ke berat iya nya sekalika parti ulih menang penuduk nya tauka enda ungkup BN.
“Diatu, chalun dipilih ketegal ditemu ulih menang lalu ukai ketegal parti udah nganjung chalun bediri ba penuduk nya ba pengawa bepilih ke udah,”ku iya madah ngagai The Borneo Post kemari.
Dr Rayong mansutka penerang nya lebuh ngenang jaku tangkan ti dikenatai Najib ngagai parti dalam gempung BN rambau gempuru Injin Pengawa Bepilih Besai Ke-14 (PRU14) ke diatur di Putra World Trade Centre(PWTC) kena Hari Enam tu tadi.
Najib maya nya madah ba atur ngagih penuduk, parti dalam gempung BN enda ulih ngarap sida seruran ngempu sebengkah penuduk ba PRU14 ti deka datai.
Chairman Komiti UMNO Selangor Tan Sri Noh Omar ti nerangka jaku tangkan nya madah, Najib meratka penyerakup lalu parti dalam gempung BN meseti sedia nerima penemu orang bukai dikena nentu BN teulihka pemujur besai ba PRU14.
Noh madah Najib udah netapka dia ba PRU14, agih penuduk bepelasarka chalun ke ulih menang, iya nya bebida ari tiga pengawa bepilih ke udah ke alai agih penuduk bepelasarka atur lama.
“Enti kitai deka menang, kitai meseti nerima penemu bukai. Kitai enda ulih napi pengawa bepilih nitihka chara lama.
“Enti sebengkah penuduk diempu sebengkah parti dulu agi ari tu, ukai reti parti nya deka ngempu belama. Tu maya kitai ngubah, kitai meseti ngiga chalun ke ulih menang sereta sekalika rayat ulih nerima iya (chalun).
“Ke amat, enti kitai deka menang, kitai begunaka semengat BN sereta belajar bekunsi kuasa,”ku Noh madah ngagai pemberita sentang reti jaku tangkan Najib.
Rayong madah tu mih politik chara baru ke alai sekeda parti enda meda tauka nerima.
“Sida deka ngenan sereta nagih meseti nganjung chalun tajapan nemu deka alah. Tu semina meratka ungkup diri.
“Orang politik ke baka tu dulu meratka parti diri ari ngintu pemaik BN.
“Nya ukai semngat BN. Semengat BN ke endar iya nya tetiap parti begempung nentuka pemujur BN lalu parti meseti sedia meri jalai ungkup pemaik BN,” ku iya.