Isu NCR: Komuniti Dayak patut pechaya komiti ti betuaika Uggah
SERIAN: Komuniti Dayak dilalau pechayaka Komiti ‘taskforce’ Tanah Asal Bumiputera (NCR) betuaika Sapit Kepala Menteri Datuk Amar Douglas Uggah ti mutarka isu bekaul tanah NCR.
Mansutka penerang nya, Menteri Pekara Pelajar, Sains enggau Pansik Teknologi Dato Sri Michael Manyin mega pechaya mayuh agi tanah NCR deka diberi surat pala tanah dalam timpuh tiga taun ti deka datai.
Nengah surat pala tanah nya ku iya, tanah deka lebih berega lalu orang bempu tanah ulih ngena surat nya ngenataika pinta lun.
“Tanah chukup berega ungkup bansa Dayak, baikka nya bansa Iban, Bidayuh tauka Orang Ulu, tang enti nadai surat, tanah nya ukai sebengkah reta.
“Ketegal tu mih kitai bebendar deka nentuka mayuh agi tanah NCR diberi pala tanah dalam timpuh dua tiga taun tu,”ku iya ba pengerami di Kampung Bantang malam ensanus.
Bejaku ngarika Bidayuh, Manyin ngarap komiti ‘taskforce’ deka mantu ngeluarka surat pala tanah ari Opis Tanah enggau Penyukat (JTS) ungkup tanah ti udah tembu disukat Dayak Bidayuh National Association (DBNA) nengah projek dokumentasyen tanah sida.
Iya pechaya komiti nya ke udah ngadu sekeda aum kenyau ditumbuh ba pun taun tu tadi ulih mutarka isu bekaul enggau tanah NCR.
Ngenang pekara bukai, Manyin ke mega Kaban Kunsil Nengeri (ADUN) Tebedu irauka Program Ubah Menua Pesisir (RTP) ti lubah dikereja dalam konstitusyen iya.
Iya minta ejensi ke bekaul ngemataka pekara nya enggau berat ketegal program sigi ungkup pemaik rayat sereta ulih ngurangka bida pemansang entara menua pesisir enggau kandang mengeri.
“Ninting taun, tetiap konstitusyen nerima agih belanja RM5 juta ungkup RTP. Tang ba Tebedu aku dipadah semina 30 peratus aja ke udah ditembu. Aku minta ejensi ke bekaul ngadu pengawa enggau bebendar agi,” ku iya.