MOH patut ngelangkar projek ngaga sepital baru di Kapit
KAPIT: Kaban Parlimen ( MP) Ulu Rajang, Datuk Wilson Ugak Kumbong ngarapka Opis Menteri Pengerai Malaysia (MOH) mending sereta beratika peminta Kapit ngambika ngaga sepital baru dikena nangkup peminta ti majak nambah ba pengawa ngintu pengerai berindik ari penambah penyampau tubuh peranak di sitak nya dalam kandang tiga tauka empat taun ti deka datai.
“Aku ngarapka MOH deka mendingka peminta ngaga sepital baru di Kapit. Tiga ngagai empat taun ari diatu, penyampau tubuh di Kapit deka nambah abis nadai 10,000. Diatu dipelaba bisi 120,000 iku. Sida tu (10,000) pekereja di Tekat Ai Hidro Baleh.
“Sepitak ke bisi diatu digaga Methodist Missionary dalam taun 1950 an udah nya diambi perintah dalam taun 1974, semina bisi 134 buah katil aja. Nyadi sepital tu mungkur empat pelilih menua – Song, Kapit, Bukit Mabong enggau Belaga, sereta dua pelilih mit – Nanga Merit enggau Sungai Asap.
“Ke diatu, kitai patut ngenegapka servis ngintu pengerai, ngambi mayuh agi pekereja ngintu pengerai – pakar (lutur, bedah, pediatrik, psikiatrik, ENT, ophthalmology, kardiologi, radiologi, pemesai perubat, indu misi enggau ke bukai)”, ku Ugak rambau Program Malam Mesra Bersama Timbalan Mentri Kesihatan Malaysia’ diatur di Balai Mayuh Guna Sri Baleh, kemari.
Program tu udah digulu 300 iku pekereja pengerai, bala ketuai opis sereta bala ketuai komuniti ke bukai.
“Aku suah udah minta sereta ngagauka menteri tauka sapit menteri pengerai bejalai ngabas ngagai Kapit ngambika sida empu meda gaya ke bendar di renggat pun menua.”
Ku Uggak, iya enda lantang ati ba penanggul kurang staf enggau perengka pengerai di sepital enggau klinik di Bagi Menua Kapit. Klinik ke bisi di menua pesisir mega udah kelalu tuai sereta luya lalu patut dikemanah enggau jampat.
“Ambika chunto, klinik Nanga Mujong.”
Uggak ngarapka Sapit Menteri MOH Dato Seri Hilmi Yahaya enggau raban iya nerima kangau tauka pinta iya ngambika bejalai gawa ngagai Kapit kitu, meda empu gaya tikas ngintu pengerai ti patut dikemanah.
Iya ngarapka pengudah pejalai nya, sida deka nemu sereta meretika agi penusah ditapi peranak ngelama tu, pesakit dianjung ngagai Sibu tauka Kuching ngambika nampung perubat, napi pejalai ti lama ngena bot sereta begunaka belanja ti besai.
Kapit tu sebuah menua pulau, semina ulih dilawa ngena bot, pengelama tiga jam pejalai ari Sibu.
“Aku udah minta belanja dikena ngaga sepital baru enggau disikap 250 buah katil dikena nangkup peminta ti nambah.
“Kitai nyukung perintah maya pengawa bepilih besai, nya alai, aku ngarapka perintah deka nimbal peminta tu laban pemanah pengawa ngintu pengerai beguna endur dalam pengidup.
“Diatu Kapit semina ulih dilawa nengah jalai tang enda lama da agi, kitai deka meri penerang ngagai Sarawak sereta mega menua enggai tiga buah tekat ai besai – Bakun, Murum enggau Baleh, enggau digabung 4,000 MW kuasa ngagai industri”, ku Ugak.
Iya madahka Kapit mungkur 1/ 3 pemesai tanah Sarawak. Ulu Rajang nyadi sitak parlimen pemadu besai, lebih ari 30, 080 kilometer persegi. 80 peratus peranak bepanggai ba jalai pengangkut ai, ti lama sereta begunaka belanja ti besai.
Ngelansa pasal ‘ Ekspres Klinik Satu Malaysia’, ku Hilmi, bot nya sangkai ba Jelatung Belaga, rusak sereta belanja abis udah setaun. Tu pekara chukup ngenyinuka ati.
Sapit Menteri Pengerai Malaysia Dato Seri Hilmi Yahaya dalam pejalai gawa tiga hari ngagai Kapit, berengkah ari 15 ngagai 17 Oktober.
Kena Hari Minggu tu tadi, Hilmi udah bejadika Karnival Pengerai Kapit 2017 pengelama dua hari di Balai Komuniti Melayu Kampung Muhibbah Bletih ditu, diatur Opis Pengerai Kapit.
Iya udah bejalai ngabas Klinik Desa Nanga Mujong, Baleh, Klinik Pengerai Kapit di Bletih enggau Sepital Kapit di Jalai Memora ditu, kena Hari Satu.
Pejalai Hilmi disempulang bini iya, Datin Seri Jamilah Mohd Zain, Kaban Kunsil Nengeri (ADUN) Bukit Goram Jefferson Jmait Unyat, Pemesai Pengerai Kapit Dr Hamidi Mohamad Sharkawi sereta bala bukai.
Ku Hilmi, MOH deka naka ulih mutarka penanggul suntuk pemesai perubat. Ku iya, taja ukai pangku pengawa ungkup pakar enggau pemesai perubat, tang MOH seruran meri perati khas ngagai Sarawak enggau nganjung pakar gawa.
Ku iya, lima iku da agi lutur perubat deka dianjung gawa ngagai Kapit enda lama da agi dikena ngenegapka orang gawa ke bisi diatu. Ku iya, tu mega nangkup peminta MP ti deka meda mayuh lutur agi dianjung gawa.