Kandang menua pesisir enda dikelaung nerima perengka guna pemun
Projek pemansang patut dipejalai ba selampur kandang menua nyengkaum semanjai kandang tebing tasik
MUKAH: Kandang menua pesisir sereta ke enda jauh ari mengeri mega enda patut dikelaung ari ngasaika pengelantang perengka guna enggau projek dikemendar ba renggat opis menteri besai.
Kaban Kunsil Nengeri (ADUN) Jemoreng Datuk Dr Juanda Jaya madah, iya berasai lantang enggau pengawa projek Lampu Jalan Kampung ( LJK) ari Opis Menteri Pemansang Menua Pesisir enggau Kandang Menua (KKLW). Taja pia, iya mega dekaka projek nya bela diasaika kandang menua ulu enggau semanjai kandang tebing tasik.
“Kitai endang rindu sereta gaga laban bisi projek ke bansa nya, tang anang ngelaungka kandang menua ulu enggau kandang tebing tasik baka menua kitai,” ku iya nerang.
Nitih ku iya, projek ke bansa nya endang beguna
Kitai endang rindu sereta gaga laban bisi projek ke bansa nya, tang anang ngelaungka kandang menua ulu enggau kandang tebing tasik baka menua kitai. Datuk Dr Juanda Jaya ADUN Jemoreng
endar baka di sitak dipegai iya lalu iya beratika peminta ba perengka guna nya mega beguna.
“Aku bisi tujuh peminta ungkup lampu jalai ti udah dipinta kenyau ari taun nyin tadi tang bedau nerima sebarang pemendar,” ku iya.
Peminta tu ku iya di baruh pematut ke dirunding piak Kaunsil Pelilih Matu Daro (MDMD) lalu pekara tu mega patut diperati.
“Laban semua tu bekaul enggau isu pengelikun, pengawa ti salah tau ngujungka penanggul rama nyadi,” ku Juanda nambah.
Taja pekara tu dipeda baka enda berat, tang ke bendar tau ngemai pangka besai ngagai komuniti di menua nya.
Kemari, nengah menteri iya, KKLW ngemendarka RM14.64 juta dikena ngelekatka 16,292 unit lampu LJK ungkup Sarawak.
Nitih ku iya, berengkah ari Atur Pemansang Malaysia Lumpar Ke-8 (RMK8) dataika RMK11, bisi 27. 259 unit udah dilekat di nengeri tu.
Di baruh bajet perintah besai 2017 ku iya, agih belanja udah dikemendar besai endar, RM1000 juta, dikena ngelekat LJK ngaul 120,000 unit di serata menua.
Sebedau bajet ku iya, agih belanja ke bendar ungkup projek nya semina RM5 juta ngagai RM10 juta aja tang pengudah diserenih Menteri Besai ba peminta nya, bajet projek udah ditambah.