1080 iku pesereta ngulu Program KLIK_SPM ke diatur PGBS di UCTS
SIBU: Program Kelinik Pemujur Sijil Pelajaran Malaysia (SPM) (KLIK_SPM) ke diatur Gerempung Graduate Bumiputera Sibu (PGBS) mujur digulu 1,080 iku nembiak Pom Lima kenyau ari program nya digaga ari taun 2014.
Menteri Muda Pelajar enggau Pemansik Teknologi Dr Annuar Rapa’ee madah, program tu bela disaup Palan Servis Kunsil Nengeri ( DUN) Nangka lalu Universiti Teknologi Kolej Sarawak (UCTS) nyadi piak nyediaka palan alai ngatur program.
Ku iya, keterubah program tu digaga, sepenyampau 116 iku nembiak datai ngambi bagi ba program lalu penyampau nya nambah ngagai 224 iku ba taun 2015.
Ba taun 2016, penyampau nembiak nambah ngagai 314 iku lalu taun tu penyampau nya nambah 350 iku.
“Ba taun tu, ari semua penyampau nembiak, 250 iku nembiak tu ari kelas Sastera lalu ke bukai ari kelas Sains.
“Kitai mega berasai temegah ati laban penyampau nembiak ari kelas Sains majak mayuh ngambi bagi ba program tu,” pia ku iya madah ngagai pengarang berita maya ngabas program nya di UCTS ditu, kemari.
Kaban Kunsil Nengeri (ADUN) Nangka tu mega madah, ba program tu, bala nembiak deka diberi tuisyen enda bebayar ba pengelama 10 minggu.
Ku iya, nembiak diajar enggau mata pelajar Matematik, Sains, Bahasa inggeris, Fizik, Matematik Tambahan enggau Kimia lalu diajar bala pengajar ti bepelandik di Sibu ditu.
Bekaul enggau pemujur program nya, iya madah, pemutus program endang ngelantangka ati tang empai bisi rikod disediaka.
“Aku melabaka setengah ari nembiak ke udah ngambi bagi ba program tu mujur nampung pelajar sida ngagai palan pelajar tinggi,” ku iya madah.
Iya mega ngarapka nembiak ba program nya deka bulih pemutus ke manah abis nadai lima kredit ngambika sida mujur nampung pelajar ila.