Tanah patut dikemansang dikena ngulihka asil ti besai
Juluk perintah diatu deka meda penatai pemisi rayat di menua pesisir abis nadai RM4,000 sebulan
ENGKILILI: Rayat kelebih agi komuniti menua pesisir patut nangkup peminta perintah ti dekaka tetiap ruang bilik ngembuan penatai pemisi besai manggai taun 2030.
Kaban Kunsil Nengeri (ADUN) Engkilili Dr Johnical Rayong Ngipa madah misyen enggau visyen perintah di baruh pegai Datuk Patinggi Abang Johari Tun Abang Openg bisi tagit penatai pemisi rayat kelebih agi menua pesisir abis nadai RM4,000 sebulan.
“Nya alai iya ngasuh sapit iya, Datuk Amar Douglas Uggah Embas ngiga pelin pemadu manah nambahkah penatai pemisi ruang bilik komuniti menua pesisir nengah chara ngemansangka tanah sida empu.
“Kebuah pia, semina chara tu aja ulih nambahka penatai pemisi sereta mansutka komuniti ari penyeranta,” ku iya.
Dr Rayong mansutka jaku nya lebuh bejaku bejadikan Pengawa Ngelancharka Infaq, Sedekah, Jariah/Penyerahan CSR Amanah Ikhtiar Malaysia (AIM) enggau Pengawa Nutup Bengkel Fertigasi Chabi ba Balai Mit Engkilili ditu, kemari.
Berindik ari nya, Dr Rayong bepenemu program diatur AIM tu setipak endar enggau jam iya laban kelimpah ngatur licha, bela meri jali nadai faedah ngagai bala kaban iya.
“Aku dipadahka jali nya tebuka ngagai semua enggau atur patut nyadi kaban kelab SAHABAT AIM,” ku iya seraya nambah, endang nyukung program pulaika pemaik begulai kelebih agi mantu perintah nyapai misyen rayat bepenatai pemisi tinggi.
Ngelansa silik, iya dekaka
Nya alai iya ngasuh sapit iya, Datuk Amar Douglas Uggah Embas ngiga pelin pemadu manah nambahkah penatai pemisi ruang bilik komuniti menua pesisir nengah chara ngemansangka tanah sida empu. Dr Johnical Rayong Ngipa ADUN Engkilili
bala pesereta kus enggau komuniti luar ulih berimbaka tanah sida nitihka pengingin diri, penau sereta peminta makit ba produk diasilka sida.
“Pekara pemadu beguna iya nya nempa pengawa betanam betupi nyadi dagang lalu nukar chara lama ngagai moden ungkup eksport,” ku iya nyemetak.
Dr Rayong mega merambu tetiap rumah panjai di sitak iya numbuhka Kaban Komiti Ngiga Belanja ti nyadi chara ngiga belanja di tetiap genturung pendiau enggau rumah panjai.
Enti sema orang bukai ulih mujur, nama kebuah kitai enda lalu tetiap pemujur nya berengkah ari baruh,” ku iya.
Dulu agi ari nya, bisi 15 iku ari ruang bilik kurang penatai pemisi nerima bantu ari piak AIM ti deka diterima pengelama enam bulan.
Naka diatu, kaban AIM Pampang Engkilili bisi 300 iku ari 11 pampang lalu program tu keterubah iya diatur di Engkilili pengudah bagi menua Betong apin lama ke udah.
Berebak enggau nya, Dr Rayong mega bisi nyuaka belanja ngagai KUSISA Engkilili penyampau RM3,000 sereta bela nyadi penaung AIM pampang Engkilili enggau Betong.
Sama bisi datai KUSISA Pampang Engkilili Rosita Nyuap, Menijar AIM Pampang Sri Aman Ahmad Mohamad, Menijar Wilayah AIM Wilayah Sarawak Selatan Jemat Itu Bujang, Penulung Pemesai Betanam Betupi Lubuk Antu/Engkilili Jabu Saging, Chairman Serakup Tuai-Tuai Rumah Engkilili Tuai Rumah Johnson Damu, penghulu Nyambong Maweng, kaunselor, bala tuai rumah sereta bala pesereta Bengkel Fertigasi Chabi.