RM151, 600 bantu diberi perintah nengeri ungkup peranak Long Aton
MIRI: Bisi 23 iku sida ti tasah angus rumah panjai di Long Aton, Tinjar nerima bantu belanja penyampau RM151,600 ari perintah nengeri nengah Opis Pengintu Pengelantang Mensia Mayuh (JKM) Miri.
Bantu tu nyengkaum mata duit, gari, gari enggau kereban sekula, kereban peninduk, perengka dapur enggau ramu dikena berumah ti udah disuaka Kaban Kunsil Nengeri ( ADUN) Telang Usan, Dennis Ngau rambau pejalai ngagai Long Aton, apin lama ke udah.
“Taja bantu tu enda tegantika pengerugi dalam penusah tu, tang dikearap iya ulih ngelempungka tating rayat.”
“Bantu tu mega ngayanka pengiruh perintah mantu rayat ti begunaka bantu enggau sida ditinggang penusah ngenyit,” ku iya rambau pengawa nyuaka bantu di Balai Raya Long Aton.
Dennis mega muji pemanah pengawa bala pemesai perintah ti sikar mantu mutarka penanggul rayat kelebih agi di menua ulu.
Ngelansa pasal pengawa ngupas taba rumah panjai Long Aton ti angus, ku Dennis, iya deka minta bantu ari lipan lalu dibantu deribabilun engkabang nentuka dini endur berengkah.
Dennis ngarapka peranak Long Aton bekerejasama ngentak baru rumah panjai sida ke udah angus.
Ku iya, iya enggau Kaban Parlimen (MP) Baram, Anyi Ngau bekerejasama mantu nyengkaum numbuhka komiti ngiga belanja dikena ngentak baru rumah panjai nya.
Iya mega meri terima kasih ngagai JKM di baruh pegai Datuk Sri Fatimah Abdullah, ke alai pemeri ungkup sida ti tasah angus ditambah ngagai RM5,000 dibanding RM2,500 sebedau tu.
Sama bisi datai Pemesai JKM Miri Ensiring Girang enggau Dayang Azeeyani Mohd Seri.
Ba lansa ke bukai, bisi 115 iku peranak semina tinggal gari ba punggung aja pengudah rumah panjai sida dituntung penusah angus kena 16 Ogos nyin tadi.
Penusah nyadi urung pukul 9 malam udah ngaguska kesemua rumah panjai 22 pintu nya.