Manyin: Sikap bala anak napi pengawa ba bidang industri
KUCHING: Bala apai indai enggau pengajar di Sarawak dilalau nyediaka bala anak enggau nembiak sida gawaka revolusyen industri keempat tauka Industri 4.0.
Pekara Industri 4.0 mungkur gaya pengerembai dalam automasyen, kereban internet, chuan penerang besai, enggau teknologi komputer.
Baka kuasa wap, kuasa karan, enggau automosyen digital dulu suba, sistem fizikalsiber deka nempa kilang dudi hari – kilang pintar.
Menteri Pelajar, Sains enggau Pansik Teknologi Dato Sri Michael Manyin madah semua orang di dunya tu nyengkaum di Sarawak diatu bejaku pasal 4.0, reti iya sida deka merejuk ari 2.0, ngelaungka 3.0.
“Nama pekara ti dikaul? Nama reti iya ngagai kitai ti nyadi pekereja, nyadi peranak menua tu? Sekalika iya tu deka mai pemanah tauka enda?
“Bisi dua buah runding pasal pekara 4.0: raban optimis madahka betul, kitai deka nambahka produktiviti kitai, ngangkatka pemanah pengidup kitai, nyulut agi ba semua pekara, tang raban persimis madahka deka mayuh agi orang nadai kereja laban robot deka nyilih kereja kitai.
“Beratika semua penemu tu, aku ngasaika kitai patut nyediaka diri laban nyema kitai enda sedia, bejuta iku kitai deka dibuai kereja,” ku iya rambau pengawa graduasyen Lodge Group of Schools ungkup kelas 2017 di balai sekula ditu, kemari.
Ku Manyin, mayuh universiti di seraya dunya udah nyediaka bala nembiak sida ungkup revolusyen industri 4.0.
Ambika chunto ku iya, Jerman, ke alai mayuh universiti iya endang udah dalam 4.0.
“Aku bisi ngatur pejalai belajar ngagai Jerman apin lama ke udah lalu udah ngabas tiga buah universiti dia sereta sida udah dalam 4.0.
“Aku mega dipadah nadai pekereja enda landik di Jerman, kitai di Malaysia semina bisi 20 peratus aja pekereja landik. Nama pekara ti patut digaga kitai?” ku iya.
Manyin berati, nitih ku siku pengelicha siti ari universiti di Jerman ti udah dilawa iya, endang pekara ti enda ulih nyadi ngagai sebarang menua tauka nengeri terus merejuk ari 2.0 ngagai 4.0 nyema penyampau tubuh peranak ti udah disikap ngambika belajar, nyendiaka diri enggau latih ti jampat agi sereta nyema sida bisi pemansut.
Taja pia, nyema rayat enda disikap ngambika belajar sereta nadai bisi pemansut, sida dipelaba deka berasai sanggu laban kelalu jauh merejuk, ari 2.0 ngagai 4.0.
“Tu pekara ti deka diperundingka kitai. Baka ni kitai deka nyediaka diri napi pemar 4.0 nya? Nya alai, bepanggai ba semua orang beratika iya,” ku iya.
Ku Manyin, nyadi Menteri Pelajar, Sains enggau Pansik Teknologi, iya chukup irau laban datai ke sehari tu, gaya penyapai tauka penyulut ba program Science, Technology, Engineering and Mathematics (STEM) di Sarawak naka diatu semina 20 peratus aja.
Ku iya, nya kebuah penyampau nembiak Sarawak tama ngagai kelas sains dalam Pom Empat paling mayuh 20 peratus aja.
Maya datai ba Pom Enam, iya asa laban semina 10 ngagai 15 peratus aja lalu datai ba tikas universiti, nyangka kurang agi ari nya.
“Nyema pekara tu baka tu, baka ni kitai deka besemekih? Baka ni kitai deka napi pemar 4.0? Nya alai, iya chukup mar ba kitai.
“Tu pekara ti patut diperunding semua kitai lalu kitai empu, bala anak enggau bala nembiak patut sedia,” ku iya.