Rumah panjai baru Memaloi, Skrang Ili ti betuaika TR Usup udah dirami
LUBOK ANTU: Tuai Rumah Usup Mit ari Memaloi, Skrang Ili mujur ngatur pengerami makai selamat ungkup iya ke udah dichiri nyadi tuai rumah sereta ngerami rumah panjai baru pengudah ke lama direrak ketegal ti meri awak ngagai projek jalai Pan Borneo.
Pengerami diatur di rumah panjai sementara peranak Memaloi kemari
Usup ba jaku ngagai bala mayuh madah pengaga ati ngagai Kaban Kunsil Nengeri(ADUN) Engkilili Dr Johnichal Rayong Ngipa ketegal ti udah ngagihka belanja RM200,000 ari Projek Ubah Menua Pesisir (RTP) dikena nyungkur tanah endur ngentak rumah panjai baru.
Rumah panjai baru nya didiri ba sepiak jalai nunga rumah panjai lama 41 pintu.
Usup mega gaga ketegal semua 41 pintu bilik setuju nitihka iya mindah
Tajapia ku iya, projek tejanggal mimit ketegal bisi penanggul teknikal.
“Tanah dibeli ari Sedarat Ulin nengah rega RM35,000. Jalai nuju ke rumah panjai baru benung disungkur.
“Tang projek enda nitihka perambu ketegal perengka berat ti diguna suah rusak,”ku Usup.
Iya mega madah genturung pendiau sida suah napi pe- nusah suntuk bekal ai.
“Diatu udah empah hari bejurut kami nadai bekal ai. Aku ngarap ijinsi ke bekaul ulih mutarka penusah tu,’ku iya seraya madah Rayong udah dipadah sentang penusah nya.
Iya mega ngarap, tembu rumah panjai baru ila Sarawak Energy Berhad ulih enggau lengkas nyambung lektrik.