Saratok ulih maju nyadi palan Agro-Hub
SARATOK: Parlimen P.205 Saratok bisi peluang ti amat besai ngerembai maju nyadi sebengkah palan Agro-Hub ti pemadu beguna nengeri.
Basil Thomas ti benung ngelakuka diri nyadi chalun ba Parlimen P.2015 Saratok madah, enggau pengelebih ke bisi nya diatu, pemansang sektor betanam betupi ke benung mansang di sitak Parlimen Saratok, dipelabaka deka ulih mai mayuh pemanah tauka empas postif ngagai semua piak enggau rayat Saratok lebih agi.
“Pengerembai sektor betanam betupi baka sawit, getah, lada enggau komoditi bukai ba kandang menua tu mayuh mai ubah ngagai pemansang ekonomi raban bansa ditu.
“Berindik ari nya, pemendar perintah Barisan Nasional (BN) ti bejalaika Transformasi Nasional 2050 (TN50) iya nya seiti langkar pemansang ti strategik, lebih agi ungkup raban bansa di kandang menua pesisir ngerembai sereta mansang begulai nengah mauh atur enggau langkar ke diperambu perintah,” ku iya lebuh dikerandau media, kemari.
Basil seiku pelobi ari Parti Demokratik Progresif (PDP) ke benung chakah bejalai melobi nyadi chalun ba Parlimen P.205 Saratok ba Pengawa Bepilih Besai Ke-14 (PRU 14) ke deka datai.
Iya ti mega seiku orang dagang udah suah betemu enggau raban bansa ba renggat baruh dalam sitak nya kenyau ari bulan Oktober 2015 suba.
Nitih ku Basil, dalam timpuh nya nyau deka semua endur sereta peranak di Parlimen saratok ke bisi tiga Kunsi Nengeri (DUN) udah dilawa iya.
“Ba DUN Krian, urung 80 peratus kandang rumah panjai enggau genturung pendiau udah dilawa, lalu DUN Kalaka enggau Kabong mega, kami melabaka urung 90 peratus udah dilawa.
“Bepelasarka langkar enggau perambu kami diatu, kandang endur ke bedau dilawa nya deka dilawa enda lama agi.
“Nengah program nemua baka tu, kami udah ngumpul semua penerang ari raban bansa ba renggat baruh kelebih agi pasal penanggul enggau guna sida.
“Enggau chara tu, kami deka bebendar agi mai raban bansa ba renggat baruh ngambika lebih lebih bekempit, besaup sereta ulih sama mereti lalu semua pekara nya ulih dipejalai enggau diasaika begulai,” ku iya.
Ngenang pasal infrastruktur ke bisi ba Parlimen Saratok, Basil madahka, diatu urung semua kandang endur ba sitak nya udah bisi penyambung jalai alun, bekal elekterik enggau ai.
Diatu ku iya, semina bisi beberapa kandang endur ke agi bedau bisi infrastruktur ke chukup lalu enti diberi peluang nyadi ketuai ba sitak nya ila, kami besemaya deka ngenukuka perengka guna ti baka nya pemadu dikemeratka.
Berebak enggau tu ku iya, iya dekaka raban bansa kelebih agi di menua pesisir, lebih tuai pasal politik sereta enggai meda sida bepechah ketegal bida politik.
“Ba tiap pesan ke dikenataika ngagai raban bansa, kitai suah meri penerang enggau ngelalau ngambika sida enda bebagi tauka enda sebaka runding ketegal politik.
“Pekara ke dikearpka kitai, diatu maya kitai nyerakupka raban bansa ba baruh seiti perabung sereta ngemeranka ulah ti panjai runding tauka tuai runding nengah agenda politik,” ku iya.
Ku Basil bejaku baru, pemendar nya ngayanka iya ke endang peranak menua ari parlimen nya bebendar sereta besedia megai tanggung pengawa ba kandang menua nya enyema diberi peluang enggau nerima sukung ari raban bansa.