KEMAS nentuka pelajar tumu nembiak mit seruran dikemerat
MARUDI: Opis Pemansang Mensia Mayuh ( KEMAS) ngembuan tanggungpengawa ti berat ba pengawa ngemansangka komuniti di menua tu ti nengah pelajar tumu nembiak mit.
Pemanah pelajar tumu ungkup nembiak mit di tikas taska enggau tabika beguna endar dikena ngemansangka ulah ti manah ba pelajar ngagai raban nembiak tu.
Kitai semua nemu baka ni pemanah pelajar ulih nentuka pemujur siku-siku orang.
Mayuh ari kitai enda ba endur kitai sehari tu nyema kitai enda besekula.
“Aku pechaya KEMAS udah nyediaka semua nembiak tu ungkup pengidup ti menyana sereta udah meri sida kuing pejalai nyapai penyulut ba akademik dudi hari.”
Pekara tu udah dipansutka Sekretari Politik Kepa- la Menteri, Charles Balan Seling lebuh bejaku bejadika Pengerami Konvokasyen Mit Tabika KEMAS di Pelilih Marudi, diatur di Palan Sivik Baram ditu, pagi kemari.
Pengerami tu meda bisi digulu Sapit Speaker Aum Kunsil Nengeri (DUN) Dato Gerawat Gala.
Ku iya, perintah seruran meri pemerat ngagai pelajar dikena nyamin raban nembiak kitai disikap ngambika ulih besemekih sereta mujur ba dunya jemah.
Kesemua perambu pemansang menua dipejalaika perintah begunaka pelajar tinggi sereta penau ti ulih ngemai pemujur lalu nya kebuah perintah numbuhka KEMAS.
“Meri terima kasih ngagai semua apai indai, bala pengajar enggau nembiak ti udah ngayanka penyulut sida dalam pelajar.
“Enti nadai kerejasama antara apai indai enggau pengawa, tentu bala nembiak enda ulih nyapai pemujur.”
Ngelansa pasal pengerami sehari nya, bisi 90 iku anak mit nerima setifikit sida ari semilan buah Tabika KEMAS di Pelilih Marudi iya nya Tabika Kemas di Kampung Pemindahan, Kampung Narum, Sg Brit, Sg Pasir, Sg Muam, Sg Melikat, Poyut enggau Kampung Dato Zen Galau.
Nembiak Pemadu Nyulut pulai ngagai Alnie Wulandari Albert seraya Pengajar Pemadu Nyulut dipenggi pengajar Betty Baun Likong ari Tabika Kemas Long Semiang.
Sama bisi datai Pemesai Kemas Baram, Sutinah Ibrahim, SAO Vanessa Joseph enggau Pemesai Pelajar Baram, Saripah Azizah Wan Hussain.