Indai tunggal patut nyikap diri ngena penemu ICT
Dikena besemekih ngemansangka diri dalam dagang seraya nambahka penatai pemisi, ku Rosey
MIRI: Indai tunggal patut nyikap diri enggau pengelandik sentang teknologi pemadah enggau arus penyambung (ICT) dikena nyediaka diri ngerebut peluang ti diadaka dalam ekonomi digital.
Menteri Muda Orang Indu, Ruang Bilik enggau Pemansang Anak Mit Rosey Yunus madah pansik Swinburne University of Technology dalam taun 2016 beratika, entara pun pekara ti nekul indai tunggal bekereja iya nya penanggul enda entu landik kelebih agi dalam ICT.
Ku iya, perintah beratka pekara tu lalu dekaka indai tunggal diberi penerang eng- gau kus ngambika sida enda tinggal sereta ulih bejalaika pangku pengawa mantu nambahka penatai pemisi.
Nengah pengelandik tu ku iya, indai tunggal ulih nangkup peminta Kepala Menteri Datuk Patinggi Abang Johari Abang Openg bela begulai nambahka penatai pemisi nengah ekonomi digital.
“Nya kebuah kitai ngasuh Opis Orang Indu enggau Ruang Bilik Sarawak (JWKS) ngerembaika agi atur program ke bansa tu dikena mantu mayuh agi indai tunggal.
“Berebak enggau nya, dikena ngulihka timbal pasal chara kitai ulih ngemanahka program tu ngambika en- dang mai pemaik ngagai bala pesereta,” ku iya bejaku bejadika Kus Pengelandik Pemun ICT ungkup Raban Indai Tunggal Nengeri Sarawak (ICT4IT) Siri 2/17 di Hotel Mega kemari.
Program tu diatur JWKS enggau kerejasama Serakup Indai Tunggal Sarawak (PITS) enggau Gerempung Serakup China Sarawak Bagi Menua Miri.
Sama bisi datai Chairman PITS Miri, Horey Bujang enggau Penyelaras ICT4IT, JWKS Un Siew Yien.
Ku Rosey, iya pechaya mayuh indai tunggal kelebih agi di Miri enggau Bekenu deka ngambi bagi dalam program nya, tang ukai semua ulih datai laban ke gawa kelimpah penanggul perengka pengangkut.
“Kitai ngarapka kus tu ulih nyadi pemungkal ti manah ngagai bala pesereta kelimpah nerima timbal,” ku Rosey.
Iya mega ngelalau indai tunggal ngambika minta sukung ari bala kaban PITS kelimpah bala ketuai di kandang menua sida empu.
Indai tunggal ti bedau rejista nyadi kaban PITS mega diperansang rejista nama diri empu ngambika muntang agi sida nemu program pemansang enggau sukung.
“Anang ketegal kita indai tunggal, komuniti ngukum kita enggau penemu ti salah, tauka nguji beambi ulih kelebih agi ba endur gawa.
“Tang komuniti diau ngelingi patut meri sukung ngambika sida ulih ngereja pengawa ti menyana agi dikena nambahka penatai pemisi sereta nempa pengidup ti menyana agi,” ku Rosey.
Berebak enggau program nya, Rosey mega bisi nyuaka geran bela penyampau RM5,000 ngagai PITS pampang Miri enggau PITS Nengeri.
Iya mega meri terika kasih ngagai Gerempung Serakup China Sarawak Miri ba komitmen sida bela ngemujurka kus nya.
Bisi 25 pesereta ngulu kus ti diatur berengkah ari 23 nyentuk 26 Oktober.
Batang tuju kus tu dikena mantu raban indai tunggal nambah sereta ngiri pengelandik ICT, nambahka penemu enggau meri penerang dagang nengah ‘on-line’, nambahka penatai pemisi nengah dagang ‘on-line’ sereta mantu indai tunggal gawa ngatika diri.
Nya kebuah kitai ngasuh Opis Orang Indu enggau Ruang Bilik Sarawak (JWKS) ngerembaika agi atur program ke bansa tu dikena mantu mayuh agi indai tunggal. Rosey Yunus Menteri Muda Orang Indu, Ruang Bilik enggau Pemansang Anak Mit