JKKK Tmn Boulder Built mujur ngatur kelas belajar ngaga selampai sulam
KUCHING: Biro Orang Indu Komiti Pemansang enggau pengelikun genturung pendiau (JKKK) Taman Boulder Built udah mujur ngatur kelas belajar ngaga selampai sulam, bepalan ba rumah Tuai Rumah (Tr) Spencer Birai.
Nitihku Tr Spencer madah ngagai Utusan Borneo, tuju ke ngatur kelas nya endang dikena nambahka penemu enggau pengelandik diri empu, kelimpah ari ti bisi juluk deka nyadika nya sebengkah produk dagang.
Iya arap bendar penemu enggau pengelandik baka ngasilka selampai sulam nya ulih mantu nyungkak penatai pemisi raban indu dalam biro nya empu kelimpah meri penguntung ngagai ruang bilik.
“Bala Biro Orang Indu kami apin lama, udah mujur ngatur kelas belajar ngaga selampai sulam, ti dipasuk urung 22 iku pesereta ari genturung pendiau kami empu.
“Tu sebengkah ari aktiviti ke kami, lalu ungkus belanja ke dikena ngatur kelas tu endang dipelanja JKKK.
“Naka ke diatu kami agi ngulihka penemu tauka pengelandik lalu ngaga ke guna diri empu. Enti udah landik baru kami ngaga ke dijual laban kami deka ngerejista diri ba Kraftangan Sarawak,” ku iya.
Bejaku baru iya madahka kelas belajar ngaga selampai sulam nya diatur dua hari berunggu 21 - 22 Oktober apin lama.
Kelas nya betuaika ketuai biro orang indu iya nya Ayang Lepoh.
“Kelimpah ari ngatur kelas tu, juluk kami mega deka ngatur kelas belajar betabuh ti dipelabaka deka diatur dalam bulan November tu,” ku iya seraya madahka nya mega sebengkah ari aktiviti ke diperambu ungkup taun 2017.