Sistem pelajar ke suah berubah nyikap nembiak ngena KBAT: Rosey
MIRI: Sistem pelajar ti seruran berubah ulih nyikap nembiak ngagai Kemahiran Berfikir Aras Tinggi (KBAT) seriris enggau pemansang dunya.
Menteri Muda Orang Indu, Ruang Bilik enggau Pemansang Anak Mit Rosey Yunus madahka KBAT tu beratika pengelandik nembiak ngena penemu, kreatif, inovasyen sereta refleksyen dikena mutarka penanggul.
“Bala nembiak enda bepanggai ba pelajar ti ngaul bup teks aja tang sida bisi KBAT ti ulih ngaga pemutus, bisi inovasyen sereta bepenau nempa utai,” ku iya.
Kaban Kunsil Nengeri (ADUN) Bekenu nya mansutka jaku nya rambau Program Sentuhan Ilmu Petronas (PSIP), diatur Petronas ditu, ensanus. Ku Rosey, nembiak kemaya hari patut sedia agi napi sis- tem pelajar moden ti minta sida ngembuan pengelandik berunding enggau kreatif. Ngelansa pasal PSIP, ku Rosey, Petronas endang konsisten ba pengawa nge- mansangka bala nembiak nengah pelajar abad ke-21.
Tu nyengkaum pelajar Sains, Teknologi, Kejuruteraan enggau Matematik (STEM) ti meransang bala nembiak nyerungkai penemu enggau buah runding ke baru.
“Pelajar ti meri pemerat ba bidang robotik begulai enggau Petrosains ulih meri pengelala ngagai bala nembiak kelebih agi ba pengawa bekenaka teknologi pemadu baru,” ku iya nerang.
Ba lansa ke bukai, Menijar Besai Kanan Petronas Carigali Sdn Bhd (PCSB), Anuar Ismail madahka PSIP udah meri pangka enggau pemaik ngagai lebih 16,000 iku nembiak di serata menua.
Pia mega ku iya, atur pejalai STEM seriris enggau pengawa Opis Menteri Pelajar Malaysia ti nagit nisbah 60:40 ba penama dalam bidang sains, teknikal, vokasional enggau seni.
“Taun tu, bisi 116 iku nembiak ari empat buah sekula di Sarawak udah dipelanja nyereta program PSIP.
“Sida tu nyengkaum bala nembiak ari SK Kuala Baram II, SK Bekenu, SK Sungai Tisang enggau SK Bintulu,” ku iya.
Program pengelama dua hari nya meri pemaik ngagai bala nembiak nengah aktiviti ti bepelasarka robotik kelimpah pelajar ‘coding’ enggau rekacipta.
Sama bisi datai Menijar Ngatur Servis PCSB Sarawak, Francis Xavier, pengari Menijar Besai Opis Petronas Wilayah Sarawak, Rhymie Rashidie Ibrahim enggau Sapit Pemesai Pelajar Miri, Alias Ngah.