Tetiap projek ti dipejalai meseti nitihka polisi HSE
Nadai kompromi ngagai semua nyema bisi isu bekaul enggau pengelikun pengerai, ku Masing
KUCHING: Raban ti bejalaika projek dilalau nitihka atur peminta polisi Pengelikun Pengerai enggau Rampa Menua (HSE) nyema sida deka terus nyereta projek pemansang di nengeri tu.
Sapit Kepala Menteri Tan Sri Datuk Amar James Masing madahka kebuah pia laban nadai kompromi dalam isu HSE ngagai semua piak ti enda nitihka atur peminta pengelikun ti nyadi pemerat pemadu tinggi dikena nentuka pengelikun enggau pengerai siku-siku.
“Aku ngelalau semua piak ti bekaul ngambi nitihka undang- undang enggau peminta pengelikun ti dikena ba pengawa sida. Enti nitih nadai kompromi dalam isu HSE.
“Ke amat, isu pengelikun enggau pengerai patut di- pasuk dalam perambu enggau langkar tumu sesebuah projek sereta enggau mayuh projek berumah benung dipejalai dikena napi pemansang di nengeri tu,” ku iya ke mega Menteri Pemansang Infrastruktur enggau Perengka Pengangkut.
Iya mansutka jaku nya dalam teks jaku iya ti dibacha Menteri Muda Jalai Pesisir Datuk Julaihi Narawi nyerumba Pengawa Bejadika Forum Pengelikun Opis Kereja Raya (JKR) Sarawak Ke-2 ti digulu Direktor JKR Sarawak Datu Zuraimi Sabki enggau Chairman Institut Keselamatan dan Kesihatan Pekerja Negara ( NIOSH) Tan Sri Lee Lam Thye ditu, malam ensanus.
Ku Masing, nyadi sebuah ejensi injinir besai di nengeri tu, JKR Sarawak patut nyadi chunto ti manah ba pengawa neritka atur ngagai semua piak ngambi nitihka HSE.
“Bisi sekeda taba berumah nyangka enda dialit memanah ngagai mensia mayuh ti bejalai mansa, nya alai pengelikun orang ukai pekereja tu mega enda patut ditejuka pia aja pengempu projek.
“Pengelikun endur kereja patut nyadi pekara pemadu berat lalu enda patut enda dikeibuh dikena nangkup atur kuntrik ke bukai, nyeng- kaum kuantiti projek tauka berumban nembuhka kereja ba hari bulan kepenudi,” ku iya nyemetak.
Ku iya, kaban kunsi kuntrik projek berumah patut ngayanka pekara ti nyata enggau nunjukka komitmen sida ba pengawa nambahka agi HSE nyema sida deka nyereta projek pemansang.
Tu nyengkaum nitihka semua peminta undang-undang, nambahka taba HSE enggau ngintu pengelantang pekereja di taba laban nitihka undang-undang ukai semina bekaul enggau peminta atur aja tang pekara pemadu beguna pengelikun nyawa.
Kelimpah ari nya, Masing mega ngansak sida ti bekaul nitihka Akta Keselamatan dan Kesihatan Pekerja (OSHA 1994), ti megai tanggungpengawa ke berat nyaga pengelikun ti dikereja sida ke tau ngeruga bala pekereja ba taba tauka orang besemak.
“Aku ngarapka mayuh agi pengawa meresa taba dipejalaika pengempu projek tauka neritka undang-undang ti dipeda beguna amat dikena ngelala risiko ke tau nyadi ba renggat tumu,” ku iya.
Berindik ari nya, iya ngarapka semua piak bekaul nyengkaum Opis Pengerai enggau Pengelikun Pekereja ( DOSH) Sarawak, Lembaga Pembangunan Industri Binaan (CIDB) Sarawak enggau NIOSH Sarawak patut bekerejasama enggau JKR Sarawak sereta ejensi bekaul dikena nentuka HSE dikelaku enggau meruan.
“Nyadi ejensi perintah neritka HSE, DOSH enggau CIDB Sarawak endang patut bejalaika pengawa meresa enggau suah agi ngagai taba projek sereta ngadaka interaksi ti manah begulai enggau ejensi bukai ti ngemeratka pekara HSE ba renggat tumu dikena nagang ngambi nyeliahka penusah ke tau nyadi,” ku iya.
Ba lansa ke bukai, Chairman Pengatur, Kho Thong Haw madah, forum kedua sekali tu meda enam kunchi bidang besai ti bekaul enggau Pengelikun dalam Pengawa Berumah dibantai ari beberapa speaker Lee enggau beberapa da agi speaker ke bisi dikangau.
Ku iya, program tu meda batang jaku dipansutka Zuraimi sebedau pengawa mantaika keretas kereja ari speaker dikangau.
Aku ngelalau semua piak ti bekaul ngambi nitihka undang-undang enggau peminta pengelikun ti dikena ba pengawa sida. Enti nitih nadai kompromi dalam isu HSE. Tan Sri Datuk Amar James Masing Sapit Kepala Menteri