PGPB andalka Norah mengkang nyadi chalun MP Tanjung Manis
SIBU: Gerempung Graduate Pulau Bruit (PGPB) bela sepenemu dekaka Kaban Parlimen (MP) Tanjung Manis Datuk Norah Tun Abdul Rahman mengkang nyadi chalun bediri ba penuduk nya maya Pengawa Bepilih Besai Ke-14 (PRU14) ti deka datai.
Chairman PGPB Mohd Ideris Rosdi madah, sukung sida tu bepun ari meda pemujur Norah agi dirandaka rayat di Tanjung Manis lebih agi rayat di Pulau Bruit.
“Kitai udah meda iya ransing gawa, mayuh bantu enggau geran diberi ngagai rayat ti nejuka pemujur sereta pengelantang pengidup di Pulau Bruit.
“Ari iya, mayuh pemansang udah diaduka di Pulau Bruit baka bekal ai beresi, projek jalai alun ke digaga nengah Fasa 1 (Penuai/Penibong/Betanak enggau Salah Kechil) enggau Fasa 2 (Salah Kechil/ Penipah enggau Tekajong),” pia ku iya nengah penerang media, kemari.
Nambahka penemu sida, Ideris madah, Norah semampai ngemeratka pemujur pelajar di Pulau Bruit lalu tu tampak dipeda enggau projek ngaga Sekula Sekondri (SMK) Semop.
“Penumbuh sekula tu mai pengelantang ngagai bala apai indai ditu ti enda kiruh agi nganjung anak sida ngagai sekula bukai ti jauh baka di Belawai, Daro tauka Igan,” ku iya madah.
Kelimpah ari nya, ku iya, ninting taun Norah endang deka meri bantu ngagai bala nembiak di Pulau Bruit mayar pelajar sida ba IPTA tauka IPTS.
“Semua pekara tu nejuka kitai di Pulau Bruit mengkang bekenaka pengeransing Norah nyadi pengari rayat ditu.
“Ari nya, kitai minta pemesai Barisan Nasional (BN) enda kakang ngasuh iya bediri baru ngetanka Parlimen Tanjung Manis ba PRU14 tu,” pia ku iya madah.
Ideris mega madahka sida di menua nya andal ba penggal nangkan ke tu, Norah deka mai mayuh agi macham bengkah pemansang ngagai sida nyengkaum baka pemansang modal mensia enggau awak gawa.
PGPB ditumbuhka pun taun 2015 alai diatu sida udah bisi 1,197 iku raban.
Gerempung sida chakah bejalaika pengawa ngagai rayat di Pulau Bruit.