84.79 peratus pupu pintu di Sibu udah dibayar ungkup taun 2017
SIBU: Sepenyampau RM33,918,970.53 pupu pintu udah dibayar ngagai Opis Kaunsil Sibu (SMC) ba taun tu naka ke 25 Oktober.
Chairman SMC Datuk Tiong Thai King madah, semua penyampau nya 84.79 peratus ari pupu pintu ba taun 2017 tu.
“Piak kitai mega udah ngumpul 31.32 peratus pupu pintu tauka RM2,060,996.53 ke empai dibayar sebedau tu.
“SMC meri terima kasih ngagai mensia mayuh ti udah mayar pupu pintu sida,” pia ku iya maya aum ninting bulan SMC ba Wisma Sanyan ditu, kemari.
Berebak enggau tu, iya bela ngelalau mensia mayuh ngambika mayar pupu pintu ungkup renggat kedua 2017 sebedau 31 Oktober ti deka datai.
Kelimpah ari nya, Tiong maya tu bisi madahka orang dagang tauka sida ke beempu kedai ditu meri kerejasama ke manah ba Kempen Tidak Kepada Beg Plastik 2.0 ti belabuh dipejalaika berengkah 1 Oktober tu tadi.
Iya madah, mensia mayuh mega bela meri kerejasama ba kempen tu alai sida ngena kutak keretas ke disediaka orang bekedai maya mai barang pulai.
“Kitai bela deka ngatur kimpin baka tu ba makit, ti nyadika chara kitai ngembing mensia mayuh sama ngemeratka pemeresi kandang menua,” ku iya madah.
Nambahka jaku iya, Tiong ti mega Kaban Kunsil Nengeri (ADUN) Dudong maya tu madahka MPS deka ngatur Hari Begulai enggau Mensia Mayuh 2017 ba Orange Zone di Daesco Star Mega Mall kena 28 Oktober tu.
Ku iya, program nya deka belabuh ari 10 pagi nyentuk 6 lemai.
“Kitai ngarapka mensia mayuh anang muai awak datai ngulu program tu laban maya tu sida ulih betemu enggau piak kami lebih agi betanyaka pekara ti bekaul enggau servis tauka tanggungpengawa ke dipegai SMC.
“Maya tu mega kitai bisi ngatur macham bengkah program ke bukai baka main enggau cabut tikit benasit,” pia ku iya nerang.