Perintah komited ngangkatka ekonomi ba kandang HDA
Mayuh projek dipejalaika nyengkaum nanam getah, nginang engkelulut dikena ngangkatka ekonomi
LONG LAPUT: Bisi 10,000 iti kutak kayu udah diagih ngagai raban ti nginang engkelulut ungkup peranak di sitak Telang Usan, Mulu enggau Ba’Kelalan.
Sapit Kepala Menteri Datuk Amar Douglas Uggah Embas madah, projek tu sebagi ari mayuh bengkah projek ekonomi enggau infrastruktur ti diperambu dikena ngemuntang pelin pemansang dalam kandang Ejensi Pemansang Tanah Tinggi (HDA).
“Pengawa nginang engkelulut tu siti ari projek ‘low-hanging fruit’ ti diperambu HDA dikena ngeneraska singkang ba pemansang sosio-ekonomi.
“Kitai bisi 10,000 kutak diperambu ungkup kandang HDA lalu diatu kitai udah bisi nama sida ti bisi ati deka ngambi bagi ba projek tu. Bala pesereta tu meseti belatih dikena nentuka sida disikap ngena penemu nginang engkelulut, ke deka mantu sida ngasilka mayuh agi penatai pemisi sereta ngenegapka status sosio-ekonomi sida,” ku chairman HDA nya madah ngagai The Borneo Post lebuh ke dikerandau ditu, apin lama ke udah.
Uggah nyemetak madahka perintah nengeri komited ngerembaika pemansang industri betanam betupi di tanah tinggi ke ngaul komuniti menua pesisir nengah chara ngiri penemu sereta meri sukung dikena ngangkatka industri endang nyadi pekara patut.
Ku iya, sekeda inisiatif nyengkaum bejalaika mayuh macham projek ti meransang bala pesereta aktif nyereta ke ulih nerenak pengerindu ba pengawa betanam betupi ba peranak di kandang menua ulu dikemerat perintah.
“Projek tu, nyengkaum nginang engkelulut dikena nyediaka peluang ungkup komuniti menua tu chakah ngaul diri dalam aktiviti ekonomi,” ku iya.
Dulu agi ari nya, Uggah ke mega Menteri Betanam Betupi Moden, Tanah Adat enggau Pemansang Kandang Menua udah dipebasa bejadika Program Pemesai Begulai Enggau Rayat ditu.
“Tu penemuai kelima aku ngagai Telang Usan kenyau ari aku dipadu mangku pengawa, enggau tuju betemu enggau rayat sereta beratika gaya pekara ke nyadi di kandang menua tu.
“Tu mega peluang ngagai kitai mai kelala program dipejalai ari baruh perintah dikena ngemansangka kandang menua pesisir tu, siti ari kandang menua di baruh HDA.
“Tu seriris enggau misyen perintah nengeri nentuka tetiap komuniti di Sarawak deka nerima enggau ngasaika pemansang,” ku iya lebuh bejaku ba program ke diatur di rumah panjai bansa Kayan, Eda Beran, di Long Laput.
Uggah madahka kabinet nengeri mega udah ngemendarka 208 hektar ungkup projek nanam getah di Long Laput.
Ku iya, tuju projek tu dikena meransang pemansang komuniti sereta ngenegapka ekonomi komuniti menua pesisir ditu.
“Opis Betanam Betupi nengeri diberi tanggungpengawa ngemata sereta matau projek tu, ditu. Komuniti menua pesisir megai tanggungpengawa nyaga ladang getah enggau manah dikena nentuka nya ulih nyaup ngerembaika ekonomi besai ba kandang menua sida,” ku iya.
Dikena nyamin pemujur mayuh bengkah program enggau aktiviti ke diperambu di tanah tinggi, Uggah minta peranak ba kandang menua pesisir Baram terus gawa begulai enggau perintah nengeri sereta perintah besai.
Sukung ke baka nya endang beguna amat dikena ngubah Sarawak ngagai ekonomi bepenatai pemisi tinggai manggai ba taun 2030, sereta nentuka tetiap komuniti di nengeri tu deka nerima enggau ngasaika pemansang.
“Kandang tanah tinggi Baram udah jampat endar mansang berindik ari mayuh bengkah peragam enggau program ti dilangkar enggau manah ditu ti dipejalaika perintah nengeri enggau perintah besai.
“Tuju program enggau inisiatif tu deka ngadaka mayuh agi peluang ungkup komuniti menua pesisir sereta ngenegapka status rama enggau ekonomi sida seriris enggau juluk perintah deka ngubah Sarawak ngagai nengeri bepenatai pemisi tinggi datai ba taun 2030,” ku iya.
Pekara ke bukai bisi dilansa lebuh ke jaku nya nyengkaum pengawa ngemanahka rumah panjai enggau penanggul parit ti ditapi peranak rumah panjai.
“Kami (Uggah enggau bala pengari rayat) deka berandau silik agi senentang pekara tu lalu meri bantu ti patut ke pengidup ti meruan agi ngagai komuniti menua pesisir ditu,” ku Uggah.
Sama bisi datai Kaban Kunsil Nengeri (ADUN) Telang Usan Dennis Ngau enggau Chairwomen Doh Kayan Telang Usan (DKTU) ke lalu nyadi Kepala Ketuai Bansa Kayan, Temenggong Elizabeth Deng.
Dennis mantaika pengagit diri ba projek ladang getah di Long Laput laban tu deka nyadi projek ti keterubah ke deka dipejalai enggau chara ti bebida dalam sitak dipegai iya.
Ku iya nerang, peranak menua nya deka numbuhka tim ngatur projek tauka komiti ngelangkar pelin, ngatur enggau ngemataka atur pejalai projek ari pun nyentuk ke deka dibagi ngagai semua ruang bilik di genturung pendiau ti gawa rat begulai enggau Opis Betanam Betupi Nengeri.
“Dulu agi ari projek tu digaga Long Laput, bisi sekeda rumah panjai dalam sitak Telang Usan dikemendar numbuhka ladang getah tang udah tembu dikereja kunteriktor ti dipaduka.
“Projek tu meransang bala komuniti menua pesisir nyadi raban orang bumai ti nampung pengawa mansutka utai tanam ngagai mayuh bengkah raban enggau kompeni, ti deka mantu sida ngenegapka ekonomi diri,” ku iya.
Elizabeth ke mega peranak rumah panjai nya madahka iya udah nerima 158 enggau 79 peminta baru ungkup ladang sawit enggau getah ari peranak di Baram.
Program sehari nya udah digulu lebih ari 1,000 iku peranak Long Laput, lalu Uggah mega bisi ngemendarka geran Projek Mit Pemansang Menua Pesisir (MRP) RM20,000 ngagai Komiti Pemansang enggau Pengelikun Genturung Pendiau (JKKK) Long Laput, RM30,000 ungkup Kaunsil Ketuai Baram lalu RM10,000 agi ungkup DKTU dikena bejalaika aktiviti sida.
Uggah udah nya nyerahka tambak getah ngagai peranak rumah panjai, bejadika projek ladang getah ba kandang endur ditetap di Long Laput, ngelepaska 10,000 iku anak ikan ngagai pegung ti deka dikena nambahka penatai pemisi dikena melanja ungkus bejalaika Palan Pemulihan Komuniti Eda Beran Long Laput, palan ungkup peranak khas, sereta bejadika pengawa nasih tanah ungkup palan baru rumah panjai ditu, pengudah tembu bejaku.
Kepala Ketuai bansa Kenyah, Temenggong Joseph Ngau Lian, Residen Miri Sherina Hussaini, Pemesai Pelilih Telang Usan Baru Tai, Sekretari Politik Kepala Menteri Charles Balan Seling, Mandal Chairman Society of Kayan-Kenyah Elders Sarawak (Kayan) Pemancha Gilbert Ding sereta Penulung Direktor Opis Betanam Betupi (bagi pengawa betanam bepelasarka industri enggau ekonomi ruang bilik) Magdalene Lungan Ajang mega bisi datai.
Datuk Amar Douglas Uggah Embas Sapit Kepala Menteri Sarawak