Tentuka genturung pendiau seruran richah enggau aktiviti
KUCHING: Menteri Muda Undang- undang, Kaul Nengeri - Perintah Besai & Pematau Projek Sharifah Hasidah Sayeed Aman Ghazali meransang peranak genturung pendiau ngambika chakah ngatur aktiviti tauka program ti mungkur semua raban bansa.
Iya ke nyadi Kaban Kunsil Nengeri (ADUN) Samariang madahka lalau nya mungkur peranak dalam sitak ke diarika iya, ngambika genturung pendiau nya nyadi genturung pendiau ti seruran rami tauka dipeda ‘idup’.
Peranak genturung pendiau tau ngatur aktiviti tauka program baka jalai pengarap, rama, lumba enggau main, seni enggau ke bukai, ku iya.
“Baka ti kala dipadahka Yang diPertua Negeri kitai (Tun Pehin Sri Abdul Taib Mahmud) maya ke nyadi kepala menteri suba, Mengeri Kuching enda tau enda nyadi mengeri ke seruran dipeda ‘idup’.
“Tu nyengkaum genturung pendiau di dalam mengeri Kuching baka Samariang ngambika ulih nyadi ‘genturung pendiau ti idup’ nengah mayuh bengkah program ke diatur,” ku iya, ensanus.
Iya mansutka penemu nya lebuh ti bejaku ba Majlis Berambih di Lebok Dana ba Mini Galeri Peringatan Seniman Agung Tan Sri P.Ramlee ke diatur Kejiranan Rukun Tetangga (KRT) Kampung Cenderawasih.
Bejaku baru iya madahka ambika chunto aktibiti seni ulih nyadika pelasar ngagai peranak genturung pendiau ngansang penemu enggau pengelandik.
Nambahka nya aktiviti nya mega ulih ngempitka agi kaul ti enda ngira renggat umur, ku iya.
Berebak enggau tu lebuh ti ngenang mini galeri nya, iya bepenemu galeri nya ulih dikemansang tauka dikelaluka ngagai renggat tinggi agi jemah ila.
“Galeri tu engka ulih dikemansang sereta diberi kelala ngagai renggat ti tinggi agi, laban pelaba aku galeri ti baka tu ti keterubah di Samariang sereta engka ketrubah di nengeri tu,” ku iya.
Nyerumba pengerami nya, pekit belagu berduet lagu P.Ramlee bisi diatur.