Sistem latih pengelandik di menua tu patut ditegapka agi
Ngambi ulih ngangkatka makit graduet dalam bidang teknikal enggau pengelandik di menua tu, ku Uggah
MIRI: Sistem latih pengelandik sereta ngadaka kerejasama enggau industri patut ditegapka agi ngambi industri di menua tu chakah sereta nitihka peminta enggau pengerembai ekonomi Malaysia.
Sapit Kepala Menteri Datuk Amar Douglas Unggah Embas madahka pekara tu beguna endar ngambi ulih ngelakuka makit graduet bidang pengelandik di menua tu enggau menua luar.
“Tanggungpengawa pemadu mar iya nya ngadaka orang gawa ti ulih nangkup peminta industri menua tu ti patut dibai ngagai rebak Revolusi Industri 4.0,” ku iya.
Teks jaku Uggah dibacha Menteri Muda Kaunsil Kandang Menua Datu Dr Penguang Manggil rambau Karnival Kemahiran Sinar Kecemerlangan ( KSK) di Dewan Suarah Miri kemari.
Ku Uggah, pengerembai ekonomi nasional mega minta penambah ba penyampau graduet dalam bidang teknikal enggau pengelandik.
Nitih ku iya, pemerat ba pengawa ngemanahka kualiti pelajar dalam bidang pengelandik beguna endar dikena nempa modal mensia bepengelandi, bepenemu enggau bisi inovatif.
“Koridor Kuasa Ulih Dikena Baru Sarawak (SCORE) udah ngadaka mayuh pengawa puang ti ulih diisi peranak Sarawak.
Nangkan nya, pemansang orang gawa mega patut sama enggau peminta dalam SCORE, berebak enggau nya, SCORE ulih ngurangka pemindah orang gawa menua tu ngagai menua luar.
Ku Uggah, pengawa nyediaka SCORE mega mungkur pekara nyediaka orang gawa landik ti belalauka digitalisation enggau e-dagang ngagai raban nembiak.
“Perintah udah numbuhka U- SCORE dikena ngelala sereta merambu kus enggau latih teknikal ti diguna dalam industri ti bisi dalam SCORE,” ku iya.
Ba lansa ke bukai, Penguang empu nyukung KSK lalu beratika iya meri pemaik ngagai raban nembiak sereta penemu bidang pengelandik ti begunaka orang gawa.
“Nengah KSK, bala nembiak sekula ulih nemu semak agi bidang pengelandik ti engkeman enggau minat sida sereta bisi pengulih tinggi ba makit,” ku iya.
Penguang mega andal pengawa mantaika Bajet 2018 kena Hari Lima tu ukai semina ngemeratka pemansang fizikal pelajar aja tang mega ngenegapka program modal mensia.
Berebak enggau porgam nya, Opis Pelajar Pelilih Miri mega nyain Sempekat Pengawa Kunsi Program KSK begulai enggau Palan Pemansang Pengelandik Sarawak (PPKS).
Sama bisi datai Kaban Kunsil Nengeri ( ADUN) Telang Usan, Dennis Ngau, Sapit Residen Miri, Majenah Lass, Pemesai Pelajar Miri, Dr Hassan Hasbollah, Prinsipal SMK Baru Miri, Jerrah Pandin sereta bala temuai dipebasa ke bukai.
Tanggungpengawa pemadu mar iya nya ngadaka orang gawa ti ulih nangkup peminta industri menua tu ti patut dibai ngagai rebak Revolusi Industri 4.0. Datuk Amar Douglas Unggah Embas Sapit Kepala Menteri