SMC mansutka 269 iti saman penyalah muai uras sengapa endur

SIBU: Opis Kaunsil Sibu (SMC) udah ngeluarka 269 iti saman ngagai mensia mayuh ti ditemu ngereja penyalah muai uras sebarang alai ba mengeri Sibu.

Chairman SMC Datuk Tiong Thai Kibg madah, ba bulan Oktober aja, naka 22 Oktober tu tadi, piak sida udah ngeluarka 68 iti saman.

“Tebal agi sida ke ngereja penyalah tu ukai orang mengeri Sibu.

“Ari penyampau nya, 67 iti saman tauka 25 peratus penyalah muai papung insap,” pia ku iya madah maya aum ninting bulan SMC ba Wisma Sanyan ditu, kemari.

Ku Tiong, ari penyampau 269 iti saman nya, sepenyampau 145 iti saman tau- ka 53.9 peratus beungkus RM13,010.

Iya madah, piak sida mega udah nganjung 85 iti notis ngagai sida ke empai mujur mayar saman.

“Kitai ukai deka ngenusahka mensia mayuh tang kitai deka meda mensia mayuh bela ngintu pemeresi kandang mengeri Sibu.

“Penyalah muai uras baka tu nejuka piak SMC ngeluarka mayuh belanja dikena meresi uras,” ku iya madah baru.

Tiong ti mega Kaban Kunsil Nengeri ( ADUN) Dudong madah, iya berasai sinu ninting maya orang ke ngereja penyalah nya datai ngelawa iya minta bayar saman dikurangka agi laban bisi penanggul ba belanja.

SMC ngeletak ukum RM500 ngagai mensia mayuh ke ditemu ngereja penyalah muai uras sebarang alai ba mengeri tu belabuh ari 1 Julai tu tadi.

Berebak enggau aum nya mega, Tiong bela mantaika isu senentang pengawa orang dagang ti nyadung keretas dikena ngelakuka dagang sida.

Iya madah, keretas nya disadung tauka diengkah ba cheremin kerita.

“Udah nya, orang ke beempu kerita endang sigi muai keretas nya sebarang alai.

“Kitai enda ngasuh orang dagang ngelekatka keretas baka tu laban tu nejuka rampa menua deka kamah,” ku iya madah.

Iya mega ngelalau mensia mayuh enda sepeneka muai keretas nya.