MPS mujur nangkap 160 ukui ti bekedayau ngapa

SIBU: Urung 160 iiku ukui udah ditangkap piak Kaunsil Mengeri Sibu (MPS0 kenyau 1 ngagai 24 Oktober tu tadi.

Chairman MPS, Datuk Tiong Thai King madah tuju nangkap ukui bekedayau ngapa nya dikena nentuka pengelikun mensia mayuh.

“Unit ke bejalaika pengawa nangkap ukui betapi enggau mayuh pemar.

“Semua ukui tu ditangkap laban orang ke ngempu nadai nemu ngurung sereta ngintu ukui nya,” ku iya.

Nitihku Tiong, endang enda disangkal mayuh penanggul tau nyadi bekau ari penyampau ukui ndai orang ngintu tu diteju bekedayau ngapa baka ulih ngerembaika penyakit, ngetup orang sengapa enggau ke bukai.

Nya alai, ku iya beguna amat piak kaul ngemesaika bungkur sitak sereta ngaga sangkar ke lebih besai endur engkah ukoi ke ditangkap.

“Semua sida ke bisi nupi ukui patut beratika pangka pekaraa negetif ti ditapi bekaul ari pemuntan sida ngaga nuaga ukui diri empu. ku iya.

Ngelansa pekara bukai Tiong madah, MPS udah ngaga pemutus deka meri kompaun ngagai orang ke menggi entukar sereta paking entukar sida ba pemagi jalai, tisi jalai enggau ba Laman Mengeri Sibu Fasa I enggau Fasa II sereta sitak ke bukai ba mengeri tu.

Ulah ti nadai mereti ba orang ke menggi entukar nya, ku iya nyau ngerusak sitak nya sereta ngujungka rumput mayuh mati.

“Kelimpah nya, piak kaunsil mengeri deka ngukum raban ngambu palan paking nadai pemendar ba endur nya.

“Semua taukey kedai perengka entukar enggau bengkel patut nitihka atur sereta enda salah guna lot paking ke untung diri empu,” ku iya.

Kaban Kunsil Nengeri Dudong nya mega nangkan mensia mayuh ngambika enda ngengkah entukar ba lurung belakang Jalai Channel enggau Jalai Makit, ke udah dikemanah apin lama ke udah.