Hari Pengerai Runding Dunya diatur ba iCATS, 28 Okt
KUCHING: Mensia mayuh di nengeri tu dilalau sampal ngulu program Hari Pengerai Runding Dunya 2017, ti deka diatur ba iCATS, Jalai Stampin Timur ditu kena 28 Okober tu.
Menteri Kaunsil Kandang Menua enggau Pengawa Berumah, Datuk Prof Dr Sim Kui Hian madahka, nya peluang ngagai mensia mayuh deka nemu sekalika bisi penanggul ba pengerai runding tauka enda.
Iya madahka nyerumba 25 taun program nya diatur, taun tu rambai jaku pengerami iya nya pengerai runding ba endur gawa.
“Kami nesau mensia mayuh lebih agi pengereja pengawa enggau pengaji ngambika sampal datai ngagai Hari Pengerai Runding Dunya 2017, laban topik tauka pekara ti dikerandauka taun tu iya pengerai runding ba endur gawa.
“Nengah program Hari Pengerai Runding tu, kami deka meri penyedar, ngajar baka ni chara betapi enggau bakani chara deka ngenukuka bisi penanggul ba pengerai runding.
“Nya alai kitai meransang mensia mayuh datai laban diatu kitai bendar ninga sereta macha mayuh isu tauka pekara ke nyadi ba palan endur gawa, ba rumah kelimpah di sekula,” ku iya dalam aum pengarang berita program nya, kemari.
Hari Pengerai Runding Dunya 2017 tu ila diatur Gerempung Pengerai Runding Sarawak (MHAS) begulai enggau Sepital Besai Sarawak, Sepital Sentosa enggau Universiti Malaysia Sarawak ti dipelabaka deka dipenyadika Dr Sim.
“Anang saru, enti bisi penanggul ba pengerai runding ukai reti iya nuan gila. Laban dulu suba nama bisi penanggul ba runding lalu dipadah gila,” ku iya.
Nitihku Presiden MHAS Pampang Kuching, Dr Lau Kim Kah lebuh dirandau pengarang berita seraya madahka, kelai tumu sesiku orang bisi penanggul ba pengerai runding baka tusut runding, ulah berubah, enda begulai enggau bakih sama enggau gawa sereta ke bukai.
“Enti nuan tusut runding ba endur gawa, nuang nadai berasai gaga, nadai tuchum, ngereja pengilap maya gawa enggau ke bukai, lalu semua nya ulih meri empas ngagai kompeni sereta bala bakih ke sama enggau gawa.
“Tang enti nuan ditemu tumu bisi penanggul ba pengerai runding, dia bala bakih tauka orang ti enggau nuang begulai ulih merindang kelimpah ari minta penemu ari kaunseling,” ku iya.
Entara ativiti tauka atur program ke diatur nyerumba Hari Pengerai Runding Dunya 2017 baka meresa pengerai runding, pengawa pemandang, kiuz kelimpah ari bisi licha ari beberapa speaker ke dikanggau.
Entara topik licha ke deka dikenatai maya tu ila iya nya pengerai runding ba endur gawa ulih Senior Consultant Psychogeriatrician & Direktor Sepital Sentosa, Dr Ismail Drahman; jurai pasal Common Mental Health Issues in Workplace ari Dr Lau enggau Mental Health Resiliency: Coping Skills and Healthy Communication skill ulih Counsellor berejister, Kelly Lee Chow Hui.