PBDSB minta perintah nengeri mansutka statistik status tanah
KUCHING: Parti Bansa Dayak Sarawak Baru (PBDSB) minta Perintah Barisan Nasional ( BN) Negeri Sarawak ngadu pengawa enggau proaktif sentang isu ke bekaul enggau tanah di nengeri tu.
Presiden Cobbold John madah pengawa ke patut dikereja Kabinet BN Sarawak iya nya mansutka data statistik status tanah.
“Enti perintah BN Nengeri betuaika Datuk Patinggi Abang Johari Tun Openg keran sereta lurus deka mutarka isu tanah NCR, sida meseti mansutka data statistik status tanah di negeri tu”, ku Cobbold.
Nitihka penerang iya, mensia mayuh nemu diak tanah di Sarawak diempu Perintah lalu dibagi ngagai dua kategori iya nya ‘registered stateland’ enggau ‘unregistered stateland’.
Cobbold netapkka Tanah Hak Orang Asal (NCR) diintu ba ‘unregistered stateland’.
“‘ Unregistered stateland’” tu mih ke nyadi isu pengudah Perintah meri PL(provisional lease) ngagai kompeni tauka sesiku orang nengah Seksyen 28 Kanun Tanah Negeri”, ku iya.
Iya madah, Perintah BN Sarawak patut mansutka data statistik nya ngambika ditemu mensia mayuh.
Kabinet negeri ku iya patut madahka ngagai peranak Sarawak pemesai tanah ke udah digizit nyadi ‘registered stateland’, ‘unregistered stateland’, PL ke udah diberi, tanah ke udah diberi geran(orang seseiku) nengah Seksyen 18 enggau kompeni ke megai PL.
Kelimpah ari nya Cobbold mega madah PBDSB deka nemu status bempu tanah ‘gunasama’ nengah Seksyen 6.
Cobbold pechaya nadai kebuah BN enda ulih mansutka data statistik nya ketegal data nya sigi bisi dikembuan Opis Tanah enggau Penyukat(JTS).
“Ya... patut nadai nyadika penanggul. Engka bisi orang bempu tanah ke deka dijaga.
“Kitai peranak Sarawak kelebih agi bansa asal baka ke Dayak, Melanau enggau Melayu bisi hak nemu pekara tu,” ku Cobbold.